Zaburi 67 - Kinyarwanda Bibiliya Ntagatifu

Isengesho rusange nyuma y’isarura

¹ Igenewe umuririmbisha; igaherekezwa n’inanga z’imirya. Ni zaburi igenewe kuririmbwa.

² Imana nitubabarire, maze iduhe umugisha, itwereke uruhanga rwayo rubengerana,

³ kugira ngo ku isi bazamenye ko ari wowe ugenga, n’amahanga yose amenye ko ari wowe ukiza. (guceceka akanya gato)

⁴ Mana yacu, imiryango yose nigusingize, imiryango yose nigusingirize icyarimwe!

⁵ Amoko yose niyishime, aririmbe, kuko utegekana ubutabera ibihugu byose, ukagenga amahanga yose y’isi. (guceceka akanya gato)

⁶ Mana yacu, imiryango yose nigusingize, imiryango yose nigusingirize icyarimwe!

⁷ Ubutaka bwacu bweze imbuto, Nyagasani, Imana yacu, aduhunda atyo imigisha.

⁸ Imana niduhe umugisha, kandi niyubahwe n’isi yose aho iva ikagera.