Zaburi 61 - Kinyarwanda Bibiliya Ntagatifu

Isengesho risabira umwami

¹ Igenewe umuririmbisha, igaherekezwa n’inanga y’imirya. Iri mu zo bitirira Dawudi.

² Mana yanjye, umva ugutakamba kwanjye, uhugukire isengesho ryanjye.

³ Aho ndi ku mpera z’isi, ni wowe niyambaza iyo umutima wanjye wacitse urukendero. Uzanjyana unshyire hejuru y’urutare rurerure ntakwigezaho,

⁴ kuko ari wowe buhungiro bwanjye, n’umunara udahangarwa, imbere y’abanzi banjye.

⁵ Icyampa ngo nibere mu ihema ryawe iteka ryose, akaba ari ho mpungira, nkihisha mu mababa yawe! (guceceka akanya gato)

⁶ Koko, Mana yanjye, wumvise imihigo nakugiriye maze abatinya izina ryawe ukabaha umugabane bakwiye.

⁷ Uhe umwami kumara iminsi n’iminsi, imyaka ye ihinduke ibisekuruza n’ibisekuruza.

⁸ Nateke ijabiro ubuziraherezo mu maso y’Imana, ineza n’ubudahemuka byayo bimurinde.

⁹ Ubwo rero nzacurangira izina ryawe ubuziraherezo, kandi nubahirize buri munsi imihigo nakugiriye.