Zaburi 60 - Kinyarwanda Bibiliya Ntagatifu

Isengesho rusange ry’imbaga imaze kuneshwa mu ntambara

¹ Igenewe umuririmbisha. Iririmbwa nk’iyitwa «Lisi y’Isezerano». Iri mu zo bitirira Dawudi, bakayiririmba banihiriza ijwi. Igenewe kwigisha.

2 Yahimbwe igihe Dawudi arwanye n’Abanyaramu bo muri Mezopotamiya, kimwe n’ab’i Soba; hanyuma Yowabu yahindukira akanesha Edomu, basakiraniye mu mubande w’Umunyu, akajujubya abantu ibihumbi cumi na bibiri.

² Yahimbwe igihe Dawudi arwanye n’Abanyaramu bo muri Mezopotamiya, kimwe n’ab’i Soba; hanyuma Yowabu yahindukira akanesha Edomu, basakiraniye mu mubande w’Umunyu, akajujubya abantu ibihumbi cumi na bibiri.

³ Mana yacu, waradutaye, turatagarana; wari waturakariye, ariko ongera udukomeze.

⁴ Wahungabanyije isi, urayisatagura; none gira usane ibyuho byayo, kuko igiye kuriduka!

⁵ Umuryango wawe wawugejeje ahaga, maze utunywesha divayi isindisha! (guceceka akanya gato)

⁶ Abakubaha wabahaye ikimenyetso, ugira ngo bahunge abarashi!

⁷ Kugira ngo inkoramutima zawe zirokoke, dukirishe indyo yawe, maze udusubize.

⁸ Imana yavugiye mu Ngoro yayo ntagatifu, iti «Ndatsinze! Negukanye Sikemu, umubande wa Sukoti nywucemo imigabane!

⁹ Gilihadi ibaye iyanjye, na Manase ni iyanjye; Efurayimu ihindutse ingofero y’icyuma nambaye ku mutwe, naho Yuda ni inkoni yanjye y’ubutegetsi;

¹⁰ Mowabu yo ibaye igikarabiro niyuhagiriramo, inkweto zanjye nkazirambika kuri Edomu, ngakoma akamu, nteye Ubufilisiti.»

¹¹ Ni nde uzanjyana mu mugi ucinyiye, ni nde uzangeza muri Edomu?

¹² Nta wundi utari wowe, Mana yadutaye, none ukaba utagitabarana n’ingabo zacu.

¹³ Gira uze udutabare, udufashe kurwanya abanzi, kuko ubuvunyi buturuka ku bantu ari nta cyo bugeraho.

¹⁴ Nituba hamwe n’Imana ni bwo tuzatsinda, ni yo izaribata abanzi bacu.