Zaburi 6 - Kinyarwanda Bibiliya Ntagatifu

Isengesho ryo mu gihe cy’amagorwa

¹ Igenewe umuririmbisha, ikajyana n’inanga y’imirya munani. Ni zaburi iri mu zo bitirira Dawudi.

² Uhoraho, mpana utandakariye, nkosora, utabishyizemo ubukare!

³ Gira ibambe, Uhoraho, dore nta ntege ngifite; Uhoraho, nkiza, dore amagufa yanjye arajegajega,

⁴ ndahinda umushyitsi umubiri wose. Mbese Uhoraho, amaherezo azaba ayahe?

⁵ Uhoraho, garuka umbohore, nkiza ugiriye impuhwe zawe!

⁶ Koko rero abapfuye ntibakwibuka; ikuzimu se ni nde wagusingirizayo?

⁷ Dore naciwe intege no kuganya. Uko ijoro riguye, umusego wanjye uhinduka amazi, uburiri bwanjye bukajandama kubera amarira.

⁸ Amaso yanjye yahennye kubera agahinda, imboni zanjye zirahondobera ku mpamvu y’abandwanya.

⁹ Nimumve iruhande mwese, mwa bagizi ba nabi mwe, kuko Uhoraho yumvise imiborogo yanjye.

¹⁰ Uhoraho yumvise uko mutakira, maze yakira amasengesho yanjye.

¹¹ Abanyanga nibakorwe n’ikimwaro, bahindagane, bamwarwe bose, basubire inyuma!