Zaburi 55 - Kinyarwanda Bibiliya Ntagatifu

Isengesho ry’umuntu watereranywe n’incuti ye

¹ Igenewe umuririmbisha, igaherekezwa n’inanga z’imirya. Ni inyigisho mu zo bitirira Dawudi.

² Mana yanjye, umva isengesho ryanjye, ntiwirengagize ugutakamba kwanjye.

³ Wite ku byo nkubwira, maze unsubize! Dore nazindaye, ndaganya nteshaguzwa,

⁴ kubera induru umwanzi amvuzaho, n’inkeke nshyizweho n’umugiranabi. Koko rero bampurijeho ubugome bwabo, bantera buje umujinya.

⁵ Umutima wanjye urasabayangwa mu gituza cyanjye, ubukangarane simusiga bwambundikiye,

⁶ ubwoba n’umushyitsi byantashye, none ubu ndatengurwa wese.

⁷ Nuko ndavuga nti «Iyaba nari mfite amababa nk’ay’inuma, kugira ngo nigurukire, nshake aho mpungira.

⁸ Koko nahungira kure, ijoro nkarirara mu butayu;

⁹ nagira bwangu, nkahasanga ubuhungiro bundinda umuyaga w’inkubi!» (guceceka akanya gato)

¹⁰ Nyagasani, sobanya amagambo yabo, boye guhuza imvugo; kuko nduzi urugomo n’intonganya byabaye urudaca mu mugi,

¹¹ bigakomeza kwiyongera ku nkike zawo umunsi n’ijoro! Muri wo nyirizina hahora ubugome n’ubwicanyi,

¹² mu mugi rwagati hagakorerwa amahano, urugomo n’ubuhendanyi ntibitirimuke mu mihanda yawo.

¹³ Yabaye ari umwanzi untuka, we namwihanganira; yabaye ari umubisha unteye akantsinda, we namwibeta, nkamucika.

¹⁴ None ni wowe tureshya, wowe dusanganywe, ukaba n’incuti yanjye y’amagara!

¹⁵ Ni wowe twabwiranaga amabanga, tukajyana mu Ngoro y’Imana dushyize hamwe!

¹⁶ Baragashira barimbuke, barindimukire ikuzimu ari bazima, kuko ubugome bwagandiye iwabo, bukabarika mu mutima.

¹⁷ Jyeweho, icyanjye ni ugutabaza Imana, kandi koko Uhoraho azandokora.

¹⁸ Haba nimugoroba, haba mu gitondo cyangwa se ku gicamunsi, iyo nagirijwe n’ibyago ndaganya, ngataka, maze akumva ijwi ryanjye,

¹⁹ akangoboka, akandinda kugira icyo mba, igihe hariho abandwanya, n’ubwo baba benshi kangahe! (guceceka akanya gato.)

²⁰ Imana nibyumve, maze ibacishe bugufi, yo itetse ijabiro kuva kera kose! Bo ntibateze kwisubiraho, kuko badatinya Imana.

²¹ Uwo muntu yabanguye ukuboko kwe, agirira nabi incuti ze, maze atatira igihango.

²² Mu kanwa ke hasokoka amagambo aryohereye, ariko umutima we ugahora ushoza intambara; amagambo ye aza arusha amavuta koroha, ariko ntibiyabuze kuba inkota zityaye.

²³ Tura umuzigo wawe, uwukorere Uhoraho, na we azagutera inkunga; ntazemera ko intungane ihungabana na rimwe.

²⁴ Naho wowe, Mana, uzabaroha mu rwobo rwasamye; abantu b’abicanyi n’ababeshyi ntibazigera barama, ngo bacagase nibura iminsi y’ukubaho kwabo. Jyeweho, ni wowe niringiye.