Zaburi 50 - Kinyarwanda Bibiliya Ntagatifu

Ubutungane buruta ibitambo byose

1 Ni zaburi ya Asafu

¹ Ni zaburi ya Asafu Imana nya mana, ari yo Uhoraho, ivuze ijambo rikoranya isi yose, guhera mu burasirazuba kugeza mu burengero bwaryo.

² Imana irabagiraniye kuri Siyoni, yo, bwiza buzira inenge.

³ Imana iraje, maze ivuge yeruye! Dore imbere yayo haragurumana umuriro, n’impande zayo hagahuha umuyaga w’inkubi.

⁴ Itumije ijuru, kimwe n’isi iri hasi, ngo bihugukire urubanza ifitanye n’umuryango wayo.

⁵ Iti «Nimunkoranyirize abayoboke banjye, ba bandi twagiranye igihango kigasozwa n’igitambo!»

⁶ Nuko ijuru ryamamaza ubutabera bwayo, rigira riti «Ni koko, Imana ni yo mucamanza!» (guceceka akanya gato)

⁷ Na yo iti «Tega amatwi, muryango wanjye, ngiye kuvuga; Israheli we, hari icyo ngiye kugushinja, jyewe Imana, nkaba n’Imana yawe!

⁸ Ibitambo untura, si byo nguhora, kuko ibitambo byawe bitwikwa bimpora imbere.

⁹ Sinkeneye gufata ikimasa mu rugo rwawe, cyangwa se amasekurume mu rubumbiro rwawe.

¹⁰ Kuko inyamaswa zose zo mu ishyamba ari izanjye, kimwe n’amatungo atabarika yose arisha ku gasozi;

¹¹ nzi inyoni zose zo mu kirere, n’ibisimba byose ni ibyanjye.

¹² Ndamutse ngize inzara, sinaza kubikuganyira, kuko isi n’ibiyirimo byose ari ibyanjye.

¹³ Ese koko nkeneye kurya inyama z’ibimasa, cyangwa kunywa amaraso y’amasekurume?

¹⁴ Ahubwo jya utura Imana igitambo cyo kuyishimira, kandi wuzuze amasezerano wagiriye Umusumbabyose;

¹⁵ hanyuma uzabone ubunyiyambaza igihe cy’amagorwa, ubwo rero nzagutabara, maze nawe unsingize.» (guceceka akanya gato)

¹⁶ Naho umugiranabi, Imana iramubwira iti «Kuki ushyanukira gutondagura amategeko yanjye, no guhoza ku rurimi isezerano ryanjye,

¹⁷ nyamara ntukunde gukosorwa, maze amagambo yanjye ukayata hirya?

¹⁸ Iyo ubonye umujura, umubera icyitso, mu busambanyi ugahabwa icyicaro.

¹⁹ Umunwa wawe uwurundurira amagambo y’ubugome, ururimi rwawe rugahimbazwa no kuvuga ibinyoma.

²⁰ Uricara, ukavuga nabi umuvandimwe wawe, bityo ukandagaza mwene nyoko.

²¹ Ibyo ni byo ukora, none ukabona ko naceceka? Wibwira se ko meze nkawe? Dore ndagushinja, byose mbisheshe imbere yawe.

²² Murumvireho namwe, abiha kwirengagiza Imana, ejo ntazabashwanyaguza, ntimubone ubatabara.

²³ Untura ibisingizo ho igitambo, ni we umpa ikuzo, kandi aba aciye inzira nzamwerekeramo umukiro w’Imana.»