Zaburi 5 - Kinyarwanda Bibiliya Ntagatifu

Isengesho rya mu gitondo

¹ Igenewe umuririmbisha, ikajyana n’umwirongi. Ni zaburi iri mu zo bitirira Dawudi.

² Uhoraho, tega amatwi ibyo nkubwira, ushishikarire kumva amaganya yanjye.

³ Hugukira ijwi ryanjye rigutabaza; Mwami wanjye kandi Mana yanjye, ni wowe ntakambira.

⁴ Uhoraho, guhera mu gitondo wumva ijwi ryanjye; kuva mu gitondo ndakwitegura, ngakomeza kuba maso.

⁵ Nta bwo uri Imana yuzura n’ikibi, umugome ntiyakirwa iwawe.

⁶ Umunyagasuzuguro ntaguhinguka imbere; uzirana n’abagizi ba nabi bose,

⁷ ukarimbura abanyabinyoma. Umuntu wese w’umuhendanyi cyangwa w’umwicanyi, Uhoraho nta bwo arebana na we.

⁸ Naho jyewe, ninjira mu nzu yawe, mbikesheje impuhwe zawe nyinshi. Mpfukamana icyubahiro, ndangamiye Ingoro yawe ntagatifu.

⁹ Uhoraho, girira ubutungane bwawe, unyobore, umwaze abahora bangenza, untegurire inzira ushaka ko nyuramo.

¹⁰ Kuko bo, nta cyakwizerwa cyabava mu kanwa, mu mutima wabo haganje ubugiranabi; umuhogo wabo ni imva yasamye, akarimi kabo ni ibinyoma gusa.

¹¹ Mana, gira ubaryoze ibyo byose! Imigambi yabo nibaviremo umutego ubahitana! Bameneshe kubera ibicumuro byabo byinshi, kuko bakugomera!

¹² Naho abagufiteho ubuhungiro bose bazanezerwa, bahore basabagizwa n’ibyishimo; abakunda izina ryawe uzabarengera, ubahe kuvuza impundu.

¹³ Uhoraho, ni wowe uha intungane umugisha, ineza yawe ikamukingira nk’ingabo.