Zaburi 48 - Kinyarwanda Bibiliya Ntagatifu

Siyoni, umusozi w’Imana

¹ Ni indirimbo iri muri zaburi z’abahungu ba Kore.

² Uhoraho ni igihangange akwiriye gusingirizwa bihebuje mu murwa w’Imana yacu.

³ Umusozi we mutagatifu urajimije mu bwiza, ukanezeza isi yose! Umusozi wa Siyoni uri hariya mu majyaruguru, ni wo wubatseho umurwa w’umwami w’igihangange;

⁴ Imana ituye hagati mu ngoro zaho, ikaherekanira ko ari yo buhungiro butavogerwa.

⁵ Dore abami bari bawibasiye, bashyira nzira icyarimwe;

⁶ ngo bawurabukwe, bose bagwa mu kayubi, ubwoba burabataha, maze amaguru bayabangira ingata!

⁷ Umushyitsi ubafatira aho ngaho, baratengurwa nk’umugore wafashwe n’ibise.

⁸ Ubwo bari batewe n’umuyaga w’iburasirazuba, wa wundi umenagura amato manini y’i Tarishishi.

⁹ Uko twabyumvise, ni ko twabyiboneye, mu murwa w’Imana yacu, mu murwa w’Uhoraho, Umugaba w’ingabo, wa wundi Imana ishyigikiye ubuziraherezo. (guceceka akanya gato)

¹⁰ Mana yacu, duhora tuzirikana ineza yawe, duteraniye mu Ngoro yawe nyirizina.

¹¹ Ak’izina ryawe, Mana yacu, n’ibisingizo byawe byarasakaye kugera ku mpera z’isi. Ukuboko kwawe guharanira ubutabera,

¹² umusozi wa Siyoni uranezerewe, n’imigi ya Yuda yose irasabagizwa n’ibyishimo, yishimiye uburyo uca imanza.

¹³ Nimuzenguruke inkuta zikikije Siyoni, mubare iminara ihari;

¹⁴ mwitegereze inkike zayo, mubarure ingoro zubatsemo, maze muzabwire abo mu gisekuru gitaha

¹⁵ ko iyi Mana ari yo Mana yacu iteka ryose, akaba ari na yo ituyobora!