Zaburi 46 - Kinyarwanda Bibiliya Ntagatifu

Imana iri kumwe natwe

¹ Igenewe umuririmbisha. Ni indirimbo y’abahungu ba Kore, ikaririmbwa banihiriza ijwi.

² Imana ni yo buhungiro n’imbaraga zacu, ni yo muvunyi utigera abura mu gihe cy’amage.

³ Ni cyo gituma tutagira ubwoba, n’aho isi yabirinduka, cyangwa imisozi igatengukira mu ngeri y’inyanja,

⁴ n’amazi agahorera abira urufuro nk’amasumo, yakwitera hejuru imisozi igahungabana. (guceceka akanya gato)

⁵ Ariko hari uruzi rwagabye amashami, agahimbaza umurwa w’Imana, n’Ingoro y’Umusumbabyose irusha izindi ubutagatifu.

⁶ Imana iba muri wo rwagati, ntuteze guhungabana; Imana iwutabara kuva bugicya.

⁷ Amahanga yaritotombye, ingoma zirahungabana; maze Uhoraho aranguruye ijwi, isi irashonga!

⁸ Uhoraho, Umugaba w’ingabo, ari kumwe natwe; Imana ya Yakobo itubereye ubuhungiro bucinyiye! (guceceka akanya gato)

⁹ Nimuze mwirebere ibyo Uhoraho yakoze, we wakwije amatongo ku isi!

¹⁰ Ahagarika intambara kugeza ku mpera z’isi, akonyagura imiheto n’amacumu by’abarwanyi, amagare y’intambara ayaha inkongi, agira ati

¹¹ «Nimurekere aho kurwana, mwemere ko ndi Imana, nkaganza amahanga, nkaganza isi yose!»

¹² Uhoraho, Umugaba w’ingabo, ari kumwe natwe, Imana ya Yakobo itubereye ubuhungiro bucinyiye!