Zaburi 41 - Kinyarwanda Bibiliya Ntagatifu

Isengesho ry’imbabare yizeye Imana

¹ Igenewe umuririmbisha. Ni zaburi iri mu zo bitirira Dawudi.

² Hahirwa uwita ku mukene no ku munyantege nke: ku munsi w’amakuba, Uhoraho azamukiza!

³ Uhoraho azamukomeza, amuhe guhirwa ku isi. Kandi ntazamugabiza abanzi be bamuhigira!

⁴ Uhoraho amuterera inkunga aho arwariye, akamuhindurira kenshi uburyamo arambarayeho

⁵ Naratakambye nti «Uhoraho, ngirira ibambe, maze unkize, kuko nagucumuyeho!»

⁶ Naho abanzi banjye bo bakamvuga nabi, ngo «Mbese azapfa ryari? Izina rye rizazima ryari?»

⁷ Iyo hagize uje kundeba, usanga avuga amateshwa, umutima we ukaba wuzuyemo ibitekerezo by’ubugome; maze yasohoka, akagenda abyandagaza mu nzira.

⁸ Iyo bateraniye iwanjye, abanyanga bose banshimanira inzara; aho bari mu rugo rwanjye, icyabo ni ukureba aho icyago kingejeje,

⁹ bati «Ibyamubayeho ni akaga rwose, ubwo yaryamye nta bwo agiteze kweguka!»

¹⁰ Ndetse n’incuti yanjye y’amagara nizeraga, tukanasangira ibiryo byanjye, na yo yanyigaritse!

¹¹ Ariko wowe, Uhoraho, ungirire ibambe, umpagurutse, maze mbone uko mbiganzura!

¹² Rwose nzamenya ko unkunda, ari uko mbonye umwanzi wanjye atongeye kunyigambaho.

¹³ Kubera ubudakemwa bwanjye wakomeje kunshyigikira, maze ungarura iruhande rwawe ubuziraherezo.

¹⁴ Nihasingizwe Uhoraho, Imana ya Israheli, kuva iteka kuzageza iteka ryose! Amen! Amen!