Zaburi 39 - Kinyarwanda Bibiliya Ntagatifu

Umuntu ni ubusa imbere y’Imana

¹ Igenewe umuririmbisha. Ni zaburi yahimbwe na Yedutuni, ikaba mu zo bitirira Dawudi.

² Naravuze nti «Mu migenzereze yanjye nzirinda gutandukira mu magambo; umunwa wanjye nzakomeza nywufunge, igihe cyose umugomeramana azaba andi imbere.»

³ Niyemeje kwigira ikiragi, ngumya guceceka, ndinumira, bishyira kera.

⁴ Ariko bigeze aho, numva ububabare burandembeje, umutima wanjye ungurumanamo. Nkomeje kubizirikana numva umuriro uratse, ni bwo neruye ndavuga nti

⁵ «Uhoraho, menyesha amaherezo yanjye, umbwire n’iminsi nshigaje kubaho, bityo menye ukuntu ndi nyamuhitavuba!

⁶ Dore ubugingo bwanjye wabugize bugufiya, maze igihe nzamara kiba ubusabusa mu maso yawe. Buri wese ugihagaze ni umwuka w’akanya gato!

⁷ Umuntu akora hirya no hino nk’igicucu, ibyo arundarunze bikayoyoka; kandi ntanamenye uzabyegukana!»

⁸ None rero, Nyagasani, ni iki ngitegereje? Amizero yanjye ari muri wowe.

⁹ Nkiza ibicumuro byanjye byose, undinde ibitutsi by’abasazi.

¹⁰ Ndicecekeye, sinzongera kubumbura umunwa, ubwo ari wowe Mutegetsi

¹¹ Ca inkoni izamba, dore ukuboko kwawe kurambandagaje.

¹² Igihe uhana umuntu wacumuye, burya uba umukosora, maze ibyo ararikiye ukabiteza imungu: kuko buri muntu ari nk’umwuka w’akanya gato! (guceceka akanya gato)

¹³ Uhoraho, umva isengesho ryanjye n’imiborogo yanjye; amarira yanjye wiyima amatwi, ngo uyirengagize, kuko mu byawe ndi umucumbitsi, umugenzi wihitira nk’abakurambere banjye bose.

¹⁴ Erekeza hirya amaso yawe, maze nibura mbe mpumekaho bukeya, mbere y’uko nigendera, nkareka kubaho.