Zaburi 37 - Kinyarwanda Bibiliya Ntagatifu

Amaherezo y’intungane n’ay’umugiranabi

1 Iri mu zo bitirira Dawudi.

¹ Iri mu zo bitirira Dawudi. Ntugahangayikishwe n’abagiranabi, cyangwa ngo ugirire ishyari abahendanyi,

Alefu

Alefu

² kuko bagwangara bwangu nk’ibyatsi, bakuma nk’igisambu cyari gitohagiye.

Beti

Beti

³ Iringire Uhoraho, kandi ugenze neza, kugira ngo ugume mu gihugu, kandi uhagirire amahoro.

⁴ Nezezwa n’Uhoraho, na we azaguha icyo umutima wawe wifuza.

Gimeli

Gimeli

⁵ Yoboka inzira igana Uhoraho, umwiringire: na we azakuzirikana,

⁶ maze ubutungane bwawe abugaragaze nk’umuseke ukebye, n’ubutabera bwawe, bumere nk’amanywa y’ihangu.

Daleti

Daleti

⁷ Gumana ituze imbere y’Uhoraho, umwiringire, ntugahangayikishwe n’uwahiriwe na byose, n’utunzwe n’amayeri ntakakubabaze.

He

He

⁸ Reka uburakari, wime urwaho umujinya, woye kwijujuta, kuko byakugwa nabi.

⁹ Koko rero, abagiranabi bazagera aho barimburwe, naho abiringira Uhoraho batunge igihugu.

Vawu

Vawu

¹⁰ Hasigaye igihe gito, maze umugiranabi akavaho; uzamushakira aho yari atuye, usange atakiharangwa.

¹¹ Naho abakene bazatunga igihugu, bagire amahoro asagambye.

Zayini

Zayini

¹² Umugiranabi ahora acura inama yibasiye intungane, maze akayihekenyera amenyo.

¹³ Ariko Nyagasani aramugaya, kuko aba aruzi umunsi we wegereje.

Heti

Heti

¹⁴ Abagiranabi bakuye inkota, bafora n’imiheto, kugira ngo bice umukene n’indushyi, banasogote intungane.

¹⁵ Nyamara inkota bafite izabagarukana ibahuranye umutima, n’imiheto yabo izavunagurike.

Teti

Teti

¹⁶ Uduke intungane itunze turayihira kurusha ibyinshi by’abagiranabi,

¹⁷ kuko amaboko y’abagiranabi azakenyagurika, ariko Uhoraho agashyigikira intungane.

Yodi

Yodi

¹⁸ Uhoraho ateganya iminsi y’ab’indakemwa, n’umugabane wabo uzahoraho ubuziraherezo.

¹⁹ Ntibazakorwa n’ikimwaro igihe cy’amage, n’igihe cy’inzara bazarya bahage.

Kafu

Kafu

²⁰ Naho abagiranabi bazarimbuka, abanzi b’Uhoraho bamere nk’ibyatsi byo mu gisambu, bayoyoke nk’umwotsi.

Lamedi

Lamedi

²¹ Umugiranabi asaba inguzanyo, ariko ntiyishyure, naho intungane ikagira ibambe, igatanga ku buntu.

²² Abo Uhoraho yahaye umugisha bazatunga igihugu, naho abo avumye barimbukire gushira.

Memu

Memu

²³ Uhoraho ni we utuma umuntu ashingura intambwe, maze inzira anyuzemo ikamuhira;

²⁴ iyo atsikiye ntatembagara, kuko Uhoraho ari we umufashe ukuboko.

²⁵ Kuva mu buto bwanjye kugeza na n’ubu nshaje, sinigeze mbona intungane itereranwa, cyangwa urubyaro rwayo rusabiriza ibyo kurya.

²⁶ Iteka intungane igira ibambe, igatanga inguzanyo, n’urubyaro rwayo rukagira umugisha.

Sameki

Sameki

²⁷ Irinde ikibi, maze ukore icyiza, ni bwo uzagira aho utura ubuziraherezo;

²⁸ kuko Uhoraho akunda ibitunganye, kandi ntatererane abayoboke be. Naho abagiranabi bazatsembwa bidasubirwaho, inyoko y’abagiranabi igende buheriheri.

Ayini

Ayini

²⁹ Intungane zo zizatunga igihugu, zigiture ubuziraherezo.

Pe

Pe

³⁰ Umunwa w’intungane uhora uvuga iby’ubuhanga, ururimi rwayo rukavuga ibitunganye.

³¹ Amategeko y’Imana yayo iyahoza ku mutima, ikagenda itikanga icyayihutaza.

Tsade

Tsade

³² Abagiranabi bahora bagenza intungane, bagashakashaka uko bayica;

³³ ariko Uhoraho ntayibegurire, ntareke itsindwa mu rubanza.

Kofu

Kofu

³⁴ Iringire Uhoraho kandi ukomeze ukurikire inzira ye, azagushyira ejuru kugeza ubwo utunga igihugu, maze uzibonere ukuntu abagiranabi batsiratsizwa.

Reshi

Reshi

³⁵ Niboneye uko umugiranabi akoresha ubushobozi afite, mbona n’uko atumbagira nk’isederi yo muri Libani,

³⁶ ariko hanyuma nongeye guhita, nsanga yarazimiye, mushakashatse, sinongera kumubona.

Shini

Shini

³⁷ Nyamara irebere umuntu w’umuziranenge, wirebere umuntu w’inyangamugayo: koko umuntu w’amahoro asiga imbuto.

³⁸ Abigometse bose bazazimirira icyarimwe, n’inyoko y’abagiranabi icike burundu.

Tawu

Tawu

³⁹ Agakiza k’intungane gaturuka kuri Uhoraho, ni we buhungiro bwazo igihe cy’amakuba.

⁴⁰ Uhoraho arabafasha, akabarokora, akabakiza abagiranabi, maze akabarengera, kuko ari we bahungiyeho.