Zaburi 36 - Kinyarwanda Bibiliya Ntagatifu

Amatwara y’abagome n’ubuntu bw’Imana

¹ Igenewe umuririmbisha. Iri mu zo bitirira Dawudi, umugaragu w’Imana.

² Nibutse ijambo ry’ubugomeramana ryavuzwe n’umunyabyaha: kuri we, ni iki cyatuma umuntu yatinya Imana?

³ Iyo yirebye yibwira ko ari indakemwa, ntabashe kubona amafuti ye ngo ayange.

⁴ Amagambo yose avuga yuje ubugome n’ubuhendanyi, gushyira mu gaciro no gukora neza ntibimurangwaho.

⁵ Iyo aryamye ni bwo acura imigambi y’ubugizi bwa nabi, agahata ibirenge inzira itari nziza, ntabe yatekereza guca ukubiri n’icyitwa ikibi.

⁶ Uhoraho, impuhwe zawe ziganje mu ijuru, ubudahinyuka bwawe bugakabakaba mu bicu.

⁷ Ubutungane bwawe butumburutse nk’imisozi miremire, ubucamanza bwawe bukareshya n’inyenga ngari. Uhoraho, ni wowe ukiza abantu n’inyamaswa;

⁸ Mana yanjye, mbega ineza yawe ngo iraba intagereranywa ! Bene muntu babona ubuhungiro mu gicucu cy’amababa yawe,

⁹ bakijuta amafunguro amara inzara babonera mu Ngoro yawe, maze ukabashora ku ruzi rw’ibyiza bikomoka iwawe.

¹⁰ Koko rero, iwawe ni ho hari isoko y’ubugingo, kandi urumuri rwawe ni rwo natwe dukesha kubona urumuri.

¹¹ Ineza yawe urayikomereze abakumenye, n’ubutabera bwawe ubukomereze abafite umutima uboneye.

¹² Umunyagasuzuguro ntagakandagire iwanjye, n’ikiganza cy’umugiranabi ntikikantsimbure.

¹³ Ngaha abagizi ba nabi baguye imirara, baratembagaye ubudashobora kubyutsa umutwe.