Zaburi 33 - Kinyarwanda Bibiliya Ntagatifu

Ikishongoro kirata ububasha n’ububyeyi by’Uhoraho

¹ Ntungane, nimukomere amashyi Uhoraho! Abantu b’umutima uboneye bakwiye kumusingiza.

² Nimusingize Uhoraho mucuranga icyembe, munamucurangire inanga y’imirya cumi.

³ Nimumuririmbire indirimbo nshya, mumucurangire binoze muranguruye amajwi!

⁴ Kuko ijambo ry’Uhoraho ari intagorama, n’ibikorwa bye byose bikaba indahinyuka.

⁵ Akunda ubutungane n’ubutabera, isi yuzuye ineza y’Uhoraho.

⁶ Ijuru ryaremwe n’ijambo ry’Uhoraho, umwuka we uhanga ingabo zaryo zose.

⁷ Amazi y’ibiyaga ayagomerera hamwe, inyanja azikoranyiriza mu bigega.

⁸ Isi yose nitinye Uhoraho, abayituye bose bamugirire ubwoba.

⁹ Kuko ibyo avuze byose biraba, yategeka, byose bikabaho.

¹⁰ Uhoraho yaburijemo imigambi y’amahanga, ibitekerezo by’imiryango abihindura ubusa.

¹¹ Nyamara umugambi w’Uhoraho ugumaho iteka ryose, n’ibitekerezo by’umutima we bigahoraho, uko ibihe bigenda biha ibindi.

¹² Hahirwa ihanga Uhoraho abereye Imana, hahirwa umuryango yitoreye ngo ube imbata ye!

¹³ Uhoraho arebera mu bushorishori bw’ijuru, akabona bene muntu bose.

¹⁴ Aho atetse ijabiro mu ngoro ye, ahoza ijisho ku batuye isi bose;

¹⁵ ni we wenyine mubaji w’imitima yabo, kandi akamenya ibyo bakora byose.

¹⁶ Nta mwami ukizwa n’uko afite ingabo nyinshi, nta n’intwari irengerwa n’uko ifite imbaraga.

¹⁷ Kwiringira ifarasi y’urugamba, ni ukwibeshya, imbaraga zayo zose si zo zitabarura.

¹⁸ Ahubwo ni Uhoraho uragira abamwubaha, akita ku biringira impuhwe ze,

¹⁹ kugira ngo abakize urupfu, anababesheho mu gihe cy’inzara.

²⁰ Twebwe rero twizigiye Uhoraho; ni we buvunyi bwacu n’ingabo idukingira.

²¹ Ibyishimo biri mu mutima wacu ni we bikomokaho, amizero yacu akaba mu izina rye ritagatifu.

²² Uhoraho, ineza yawe iraduhoreho, nk’uko amizero yacu agushingiyeho.