Zaburi 31 - Kinyarwanda Bibiliya Ntagatifu

Isengesho ry’umuntu uri mu kaga

¹ Igenewe umuririmbisha. Ni zaburi iri mu zo bitirira Dawudi.

² Uhoraho, ni wowe buhungiro bwanjye, singateterezwe bibaho! Girira ubutabera bwawe, maze umbohore;

³ ntega amatwi, maze ubanguke untabare! Mbera urutare rukomeye, n’urugo rucinyiye nzakiriramo.

⁴ Koko rero ni wowe rutare rwanjye n’ingabo inkingira; nyobora, undandate ubigiriye kubahiriza izina ryawe.

⁵ Ngobotora mu mutego banteze, kuko ari wowe mbaraga zanjye.

⁶ Nshyize ubugingo bwanjye mu maboko yawe; ni wowe uncungura, Uhoraho, Mana nyir’ukuri.

⁷ Nanga abayoboka ibigirwamana bitagira shinge, jyeweho niringira Uhoraho wenyine.

⁸ Nzabyina nishimira cyane ubudahemuka bwawe, kuko wabonye akaga ndimo, ukamenya amagorwa yanjye.

⁹ Ntiwantaye mu maboko y’umwanzi, ahubwo wampaye gushinga ibirindiro, unshyira ahagutse.

¹⁰ Ngirira ibambe, Uhoraho, dore ndi mu kaga; amaso yanjye arahondobera kubera agahinda, umuhogo n’amara na byo byashengutse.

¹¹ Ubuzima bwanjye buhereye mu kababaro, imyaka y’ukubaho kwanjye ishiriye mu maganya. Kubera ko nacumuye byatumye imbaraga zanjye zikendera, n’amagufwa yanjye aramungwa.

¹² Abanzi banjye bose barampundazaho ibitutsi, n’abaturanyi banjye ntibakincira akari urutega. Incuti zanjye z’amagara nsigaye nzitera ishozi, abo duhuriye mu nzira barambona bagahunga.

¹³ Nsigaye naribagiranye nk’uwapfuye, meze nk’akabindi kasandaye.

¹⁴ Numva rubanda bamvuga nabi ngo «Yaciye igikuba hirya no hino!» Nuko bishyira hamwe barankomanyiriza, bajya imigambi yo kuncuza ubugingo.

¹⁵ Ariko ndakwiringiye, Uhoraho, ndavuga nti «Imana yanjye ni wowe!»

¹⁶ Ibihe byanjye biri mu kiganza cyawe, ngaho rero ngobotora mu maboko y’abanzi banyibasiye!

¹⁷ Uruhanga rwawe nirumurikire umugaragu wawe, maze unkize ugiriye impuhwe zawe.

¹⁸ Uhoraho, ntunkoze isoni kandi ari wowe niyambaje, ahubwo abagome abe ari bo bakorwa n’ikimwaro, baruce barumire nk’abagiye ikuzimu!

¹⁹ Iminwa ibeshya iragahinduka ibiragi, yo ivuga nabi intungane ibishyizemo ubushizi bw’isoni, ubwirasi n’agasuzuguro!

²⁰ Mbega ukuntu ibyiza wageneye abagutinya ari byinshi! Ubiha abo ubereye ubuhungiro bose, kandi ukabibagwizaho rubanda rwose rubyirebera.

²¹ Ubishyingura aho uhisha uruhanga rwawe, kure y’ubutiriganya bw’abantu, ukabibika ahiherereye, kure y’uruvugo rw’abantu.

²² Nihasingizwe Uhoraho, kuko ku neza ye yankoreye ibitangaza, none nkaba ndi mu mugi ucinyiye!

²³ Naho jyewe nari nataye umutwe, mvuga nti «Nirukanywe kure y’amaso yawe.» Nyamara wumvise amaganya yanjye, igihe nagutabazaga.

²⁴ Nimukunde Uhoraho, mwebwe abayoboke be mwese! Uhoraho arinda abamwemera, naho abamushingana ijosi akabaha agera.

²⁵ Nimukomere kandi mwireme agatima, mwebwe mwese abizera Uhoraho!