Zaburi 30 - Kinyarwanda Bibiliya Ntagatifu

Gushimira Imana nyuma y’amakuba akomeye

¹ Iyi zaburi ni indirimbo ijyana n’iyegurirwamana ry’Ingoro. Iri mu zo bitirira Dawudi.

² Ndakurata, Uhoraho, kuko wampaye kwegura umutwe, maze ntureke abanzi banjye banyigambaho.

³ Uhoraho, Mana yanjye, naragutakiye, maze urankiza;

⁴ Uhoraho, wanzamuye ikuzimu, maze ungarurira kure nenda gupfa.

⁵ Nimucurangire Uhoraho, mwebwe abayoboke be, mumwogeze muririmba ubutungane bwe;

⁶ kuko uburakari bwe butamara akanya, naho ubutoneshe bwe bugahoraho iteka; ijoro ryose riba amarira gusa, ariko igitondo kigatangaza impundu z’ibyishimo.

⁷ Jyewe, mu mudendezo narimo, naravugaga, nti «Nta giteze kumpungabanya bibaho!»

⁸ Uhoraho, ku neza yawe, wari waranshyize ahirengeye. Ariko ugeze aho umpisha uruhanga rwawe, maze ndakangarana.

⁹ Ni bwo rero, Uhoraho, ngutabaje, ntakambira Umutegetsi wanjye,

¹⁰ nti «Wakunguka iki mbuze ubuzima? Mpfuye bakampamba byakumarira iki? Mbese hari ubwo umukungugu wabasha kugusingiza, ukamamaza ubudahemuka bwawe?

¹¹ Uhoraho rero, nyumva, ungirire ibambe; Uhoraho, urambere umuvunyi!»

¹² Nuko amaganya yanjye uherako uyahindura imbyino, ikigunira nari nambaye ugisimbuza imyenda y’ibirori.

¹³ Ni yo mpamvu umutima wanjye uzakuririmba ubudatuza, Uhoraho Mana yanjye, nzagusingiza iteka ryose.