Zaburi 26 - Kinyarwanda Bibiliya Ntagatifu

Isengesho ry’umuntu utacumuye

1 Iri mu zo bitirira Dawudi.

¹ Iri mu zo bitirira Dawudi. Uhoraho, ndenganura, kuko ndi indakemwa mu mibereho, nkaba nizeye Uhoraho ubutagoragora.

² Uhoraho, nsuzuma, ndetse nushaka ungerageze, maze usukure ubura bwanjye n’umutima wanjye;

³ urukundo rwawe ni rwo mpora ndangamiye, kandi nkagenda nkurikiye ukuri kwawe.

⁴ Sinigeze nicarana n’abanyabinyoma, cyangwa ngo ngenderere abantu b’indyarya;

⁵ nzirana n’aho abagiranabi bateraniye, sinigeze nicarana n’abagomeramana.

⁶ Nkaraba ibiganza byanjye, mpamya ko ndi umwere, kugira ngo mbone ubwegera urutambiro rwawe, Uhoraho,

⁷ maze nkagenda mpanitse indirimbo zigusingiza, kandi ari na ko ntondagura ibitangaza byawe byose.

⁸ Uhoraho, nkunda cyane Ingoro uganjemo, aho hantu ikuzo ryawe rituye.

⁹ None rero, ntunshyire mu rwego rumwe n’abanyabyaha, cyangwa ngo unshyire hamwe n’abantu b’abicanyi.

¹⁰ Dore ibiganza byabo birarangwa n’ishyano bakoze, n’ukuboko kwabo kw’indyo gucigatiye za ruswa.

¹¹ Naho jyewe mpora ngendana ubudahemuka; Uhoraho, nkiza, ungirire ibambe.

¹² Ikirenge cyanjye gihora gishinze ahantu hategamye, ngasingiriza Uhoraho mu materaniro.