Zaburi 24 - Kinyarwanda Bibiliya Ntagatifu

Uhoraho atahana ishya mu Ngoro ye

1 Ni zaburi iri mu zo bitirira Dawudi.

¹ Ni zaburi iri mu zo bitirira Dawudi. Isi ni iy’Uhoraho, hamwe n’ibiyirimo, yose ni iye, hamwe n’ibiyituyeho byose.

² Ni we wayitendetse hejuru y’inyanja, anayitereka hejuru y’inzuzi ubutayegayega.

³ Ni nde uzazamuka ku musozi w’Uhoraho, maze agahagarara ahantu he hatagatifu?

⁴ Ni ufite ibiganza bidacumura, n’umutima usukuye, ntararikire na busa ibintu by’amahomvu, kandi ntarahire ibinyoma.

⁵ Uwo azabona umugisha w’Uhoraho, n’ubutungane bukomoka ku Mana umukiza we.

⁶ Bene abo ni bo bagize ubwoko bw’abamushaka, bagashakashaka uruhanga rwawe, Mana ya Yakobo. (guceceka akanya gato)

⁷ Marembo, nimwaguke, namwe miryango ya kera na kare, nimukinguke, maze hinjire umwami wuje ikuzo!

⁸ Uwo mwami wuje ikuzo yaba ari nde? Ni Uhoraho, Umunyabubasha, Umudatsimburwa, ni Uhoraho, Umudatsimburwa ku rugamba.

⁹ Marembo, nimwaguke, namwe miryango ya kera na kare, nimukinguke, maze hinjire umwami wuje ikuzo!

¹⁰ Uwo mwami wuje ikuzo yaba ari nde? Uhoraho, Umutegeka w’ingabo, ni we mwami wuje ikuzo. (guceceka akanya gato)