Zaburi 22 - Kinyarwanda Bibiliya Ntagatifu

Isengesho ry’umuyoboke w’Imana uri mu magorwa

¹ Igenewe umuririmbisha. Bayiririmba bakurikije injyana y’iyitwa «Imparakazi yo mu museke». Ni zaburi iri mu zo bitirira Dawudi.

² Mana yanjye, Mana yanjye, ni iki cyatumye untererana? Uri kure, ntuntabara; ndatakamba ntiwumve!

³ Mana yanjye, ku manywa nirirwa ntabaza, ariko ntunsubize, ndetse na nijoro sinigera nduhuka.

⁴ Nyamara ni wowe Nyir’ubutagatifu, ugahora usingizwa na Israheli!

⁵ Abakurambere bacu bajyaga bakwiringira, bajyaga bakwiringira, maze nawe ukabakiza.

⁶ Iyo bagutakiraga warabumvaga bakarokoka, barakwiringiraga, ntibakorwe n’ikimwaro.

⁷ Jyeweho ariko sinkiri umuntu, nsigaye ndi nk’umunyorogoto; nabaye igiterashozi mu bantu, rubanda bakampa akato.

⁸ Abambonye bose barankwena, bakampema kandi bakazunguza umutwe,

⁹ bavuga bati «Ko yiringira Uhoraho, ngaho namubohore! Ngaho namukize, umva ko amukunda!»

¹⁰ Ni wowe wanyivaniye mu nda ya mama, unshyira mu maboko ye ngo mererwe neza.

¹¹ Ni wowe neguriwe kuva nkivuka, uba Imana yanjye kuva nkiva mu nda ya mama.

¹² None rero, wimba kure, kuko nagirijwe n’amagorwa, nkaba ndafite kirengera!

¹³ Dore ibimasa byinshi byica birankikije, dore amapfizi y’i Bashani yantangatanze;

¹⁴ binshinyikiye ibyinyo, boshye intare zishihagura, ari na ko zitontoma.

¹⁵ Amagara arancika nk’amazi atemba, ingingo zanjye zose zarekanye. Umutima wanjye umeze nk’ibishashara, uranshongera mu nda nyirizina.

¹⁶ Umuhogo wanjye wumiranye nk’urujyo, ururimi rwanjye rumfata mu nkanka: ahasigaye ni aho kundenzaho agataka!

¹⁷ Rwose, imbwa nyamwinshi zankubakubye, igitero cy’abagiranabi cyantaye hagati. Bamboshye ibiganza n’ibirenge,

¹⁸ amagufwa yanjye yose nayabara! Baranyitegereza, bakanshungera,

¹⁹ bigabanyije imyambaro yanjye, igishura cyanjye bakigiriraho ubufindo.

²⁰ None rero, Uhoraho, ntumbe kure, wowe, mbaraga zanjye, banguka untabare!

²¹ Rinda amagara yanjye ubugi bw’inkota, gira ungobotore mu majanja y’imbwa;

²² unkure mu rwasaya rw’intare, ungobotore mu mahembe y’imbogo!

²³ Nzogeza izina ryawe mu bo tuva inda imwe, ngusingirize mu ruhame rw’ikoraniro,

²⁴ nti «Yemwe, abubaha Uhoraho, nimumusingize! Yemwe, bene Yakobo mwese, nimumukuze! Yemwe, bene Israheli mwese, nimumutinye!»

²⁵ Kuko atigeze yirengagiza cyangwa ngo yinube umunyabyago wazahajwe n’ubutindahare, ngo amuhishe uruhanga rwe, ahubwo akamwumva igihe amutakiye.

²⁶ Nyagasani, ni wowe nzaharira ibisingizo byanjye mu ikoraniro rigari; imbere y’abagutinya, nzubahiriza amasezerano nakugiriye.

²⁷ Abakene bazarya, maze bahage, abashakashaka Uhoraho bazamusingiza, babwirana bati «Murakarama mwese, munezerwe ubuziraherezo!»

²⁸ Isi yose, aho iva ikagera, izabyibuka maze igarukire Uhoraho, imiryango yose y’amahanga imupfukamire;

²⁹ kuko ubwami ari ubw’Uhoraho, akaba ari we ugenga amahanga.

³⁰ Abakomeye bose bo ku isi baramupfukamiye, ababereyeho kuzapfa bose bemeye kumugandukira.

³¹ Urubyaro rwabo ruzamukeza, ruzamenyekanye Uhoraho mu bisekuruza bizaza;

³² ruzamamaza ubutungane bwe, imbaga izavuka nyuma ruyitekerereze ibyo Uhoraho yakoze.