Zaburi 21 - Kinyarwanda Bibiliya Ntagatifu

Isengesho ryo gushimira Imana ibyiza yagiriye umwami

¹ Igenewe umuririmbisha. Ni zaburi iri mu zo bitirira Dawudi.

² Uhoraho, umwami wacu anejejwe n’ububasha bwawe; mbega ngo arishimira ubuvunyi bwawe!

³ Wamuhaye icyo umutima we wifuzaga, ntiwamwima icyo isengesho rye ryasabaga. (guceceka akanya gato)

⁴ Kuko wamusanganije imigisha n’ihirwe, maze ukamwambika ikamba rya zahabu inoze.

⁵ Ubugingo yagusabaga, warabumuhaye, umuha kuzaramba ubuziraherezo.

⁶ Ubuvunyi bwawe bwamuhesheje ikuzo ryinshi, umwungikanyaho icyubahiro n’ishema.

⁷ Wamugize Ruhabwamigisha iteka ryose, iruhande rwawe ahabonera ibyishimo.

⁸ Rwose, umwami wacu yiringiye Uhoraho, kandi ubuntu bw’Imana Isumba byose buzamugira indatsimburwa.

⁹ Ikiganza cyawe kizafata mpiri abakurwanya bose, ukuboko kwawe gufate mpiri abakwanga bose;

¹⁰ nuhinguka, bazahinduka nk’umuriro w’itanura. Mu burakari bwe, Uhoraho azabaroha mu nyenga, maze umuriro ubatwike, bakongoke.

¹¹ Imbuto yabo, uzayitsemba ku isi, n’inyoko yabo uyirimbure mu bantu.

¹² N’aho baramuka bashatse kukugirira nabi, uwo mugambi bakawunoza, nta cyo bazashobora na busa;

¹³ kuko uzabatera guhunga, ukabanga umuheto wawe, maze ukabavuza imyambi.

¹⁴ Uhoraho, hagurukana ububasha bwawe, maze tuzaririmbe, ducurange ibigwi by’ubutwari ugira.