Zaburi 19 - Kinyarwanda Bibiliya Ntagatifu

Igisingizo cy’Uhoraho Nyir’ibiremwa n’akamaro k’amategeko ye

¹ Igenewe umuririmbisha. Ni zaburi iri mu zo bitirira Dawudi.

² Ijuru ryamamaza ikuzo ry’Imana, n’ikirere kikagaragaza ibyiza yakoze.

³ Umunsi ubwira undi munsi inkuru yabyo, ijoro rikabimenyesha irindi joro.

⁴ Nanone, nta nkuru, nta n’amagambo, kuko ijwi ryabyo ritumvikana!

⁵ Ariko ku isi hose urusobe rwabyo rurigaragaza, n’imvugo yabyo ikagera ku mpera z’isi. Hejuru iyo kure, ni ho Imana yashingiye ihema izuba;

⁶ maze na ryo, ak’umukwe usohotse mu nzu y’ubugeni, rikishimira gukataza mu nzira yaryo.

⁷ Rirasira ku mpera imwe y’ijuru, rigataha ku yindi mpera, ubushyuhe bwaryo ntibugire aho busiga.

⁸ Itegeko ry’Uhoraho ni indakemwa, rikaramira umutima. Amabwiriza y’Uhoraho ni amanyakuri, abacisha make akabungura ubwenge.

⁹ Amateka y’Uhoraho araboneye, akanezereza umutima; amategeko y’Uhoraho ni uruhehemure, akamurikira umuntu.

¹⁰ Igitinyiro cy’Uhoraho kiraboneye, kigahoraho iteka ryose. Ibyo Uhoraho yemeje ni amanyakuri, byose biba bitunganye.

¹¹ Bikwiriye kwifuzwa kurusha zahabu, kurusha ikirundo cya zahabu iyunguruye; biryohereye kurusha ubuki, kurusha ubuki bw’umushongi bukiva mu binyagu!

¹² Ni cyo gituma umugaragu wawe abikesha kwitonda, kubikurikiza bikamugirira akamaro.

¹³ Ni nde wamenya amakosa yose yakoze? Nyagasani, urangire umwere w’ibyaha ntiyiziho.

¹⁴ Kandi urarinde umugaragu wawe abirasi, ntibakangireho ububasha! Ubwo rero nzaba intungane rwose, n’umwere w’igicumuro gikomeye.

¹⁵ Amagambo mvuga, n’ibyo umutima wanjye uzirikana, nibijye bikunogera, wowe Uhoraho, Rutare nisunga n’umurengezi wanjye!