Zaburi 149 - Kinyarwanda Bibiliya Ntagatifu

Indirimbo y’umutsindo

¹ Alleluya! Nimuririmbire Uhoraho indirimbo nshya, mumusingirize mu ikoraniro ry’abayoboke be.

² Israheli niyishimire Uwayiremye, abahungu b’i Siyoni bahimbazwe n’ibirori bakorera umwami wabo.

³ Nibasingize izina rye bahamiriza, bamuvugirize ingoma n’inanga.

⁴ Kuko Uhoraho ashimishwa n’umuryango we, ab’intamenyekana akabahaza umukiro.

⁵ Abayoboke be nibahimbazwe no kumukuza, ndetse bavugirize impundu no ku mariri yabo;

⁶ bakore mu gahogo barata Imana, ari na ko bafashe mu ntoki inkota y’amugi abiri;

⁷ kugira ngo bihimure amahanga, bahanireho imiryango y’ahandi;

⁸ abami bayo bababoheshe iminyururu, abanyacyubahiro bayo babate ku mapingu,

⁹ maze babarangirizeho urubanza rwabaciriwe. Ngiryo ishema ry’abayoboke b’Imana! Alleluya!