Zaburi 146 - Kinyarwanda Bibiliya Ntagatifu

Uhoraho ni we muvunyi w’abatagira kivurira

¹ Alleluya! Mutima wanjye, singiza Uhoraho!

² Nzasingiza Uhoraho mu buzima bwanjye bwose, ncurangire Imana yanjye igihe cyose nzaba nkiriho.

³ Ntimukiringire abantu bakomeye, ntimukizigire mwene muntu udashobora kubakiza.

⁴ Umwuka we umara kumuvamo, agasubira mu gitaka yaturutsemo; kuva ubwo, imigambi yari afite ikayokana na we.

⁵ Hahirwa uwo Imana ya Yakobo ibereye umuvunyi, maze akiringira gusa Uhoraho, Imana ye!

⁶ We Muremyi w’ijuru n’isi, inyanja n’ibiyirimo byose, akaba mudahemuka iteka ryose,

⁷ akarenganura abapfa akarengane, abashonji akabaha umugati. Uhoraho abohora imfungwa,

⁸ Uhoraho ahumura amaso y’impumyi, Uhoraho agorora ingingo z’abahinamiranye, Uhoraho agakunda ab’intungane.

⁹ Uhoraho arengera abavamahanga, agashyigikira impfubyi n’umupfakazi, ariko akayobagiza inzira z’ababi.

¹⁰ Uhoraho ni nyir’ingoma ubuziraherezo, akaba Imana yawe, Siyoni, uko ibihe bigenda bisimburana iteka.