Zaburi 144 - Kinyarwanda Bibiliya Ntagatifu

Imana ni yo iha abayo gutsinda no kugira amahoro

1 Iri mu zo bitirira Dawudi.

¹ Iri mu zo bitirira Dawudi. Nihasingizwe Uhoraho, rutare rwanjye, we utoza amaboko yanjye ibyo kurwana, n’intoki zanjye ibyo kurema urugamba.

² Ni we mbaraga zanjye, n’ubuhungiro bwanjye, ibirindiro byanjye n’umukiza wanjye; ni we ngabo inkingira, nkihugika iruhande rwe; ni na we ucogoza amahanga ngo nyategeke.

³ Uhoraho, umuntu ni iki ngo abe yagushishikaza? Mwene muntu ni iki ngo ube wamwitaho?

⁴ Umuntu ameze nk’umwuka uhumekwa rimwe, n’iminsi ye ikamera nk’igicucu gihita.

⁵ Uhoraho, bogeka ijuru umanuke; kora ku misozi, icumbe umwotsi!

⁶ Ohereza imirabyo, utatanye abanzi; rasa imyambi yawe ubakwize imishwaro.

⁷ Ramburira ukuboko kwawe mu ijuru, maze undohore mu mazi magari, unkize amaboko y’abanyamahanga,

⁸ bo bafite umunwa uvuga ibinyoma gusa, n’ukuboko kwabo kw’indyo kukavuguruza indahiro yabo.

⁹ Mana yanjye, nzakuririmbira indirimbo nshya, ngucurangire inanga y’imirya cumi,

¹⁰ wowe uha abami kuganza, ugakiza Dawudi, umugaragu wawe.

¹¹ Urankize inkota kirimbuzi, umvane mu maboko y’abanyamahanga, bo bafite umunwa wo kuvuga ibinyoma gusa, n’imvugo yabo ntijyane n’ibikorwa.

¹² Abahungu bacu barabe nk’ingemwe, zakuze neza kuva zikiri nto. Abakobwa bacu barabe beza, nk’inkingi zitakishijwe Ingoro.

¹³ Ibigega byacu birakuzura no hejuru, bisesekare imbuto z’amoko yose. Intama zacu zizororoke incuro ibihumbi, zibe uduhumbagiza mu bikingi byacu.

¹⁴ Inka zacu zirakagwira, nta cyuho, nta bushimusi, nta n’induru ikivugwa iwacu.

¹⁵ Hahirwa umuryango wifitiye ibyo byose, hahirwa umuryango Uhoraho abereye Imana!