Zaburi 14 - Kinyarwanda Bibiliya Ntagatifu

Ubugori bw’umuntu utemera Imana

1 Igenewe umuririmbisha. Iri mu zo bitirira Dawudi.

¹ Igenewe umuririmbisha. Iri mu zo bitirira Dawudi. Abapfayongo bihaye kuvuga ngo «Nta Mana ibaho!» Bapfuye umutima, biha gukora ibidakwiye, nta n’umwe ugikora neza.

² Uhoraho, aho ari mu ijuru, yarunamye yerekeje amaso kuri bene muntu, ngo arebe niba hari n’umwe ugifite ubwenge agashakashaka Imana.

³ Ariko bose bararindagiye, bahujwe gusa n’ingeso mbi; nta n’umwe ugikora neza, habe n’umwe rwose!

⁴ Koko abo bagizi ba nabi bose ni ibiburabwenge, bo bihaye kurya imitsi y’umuryango wanjye, barya icyari kiwutunze, kandi ntibigere basenga Uhoraho.

⁵ None dore batangiye guhinda umushyitsi, kuko Imana ishyigikiye ab’intungane.

⁶ Murannyega amizero y’umunyabyago, nyamara Uhoraho ni we buhungiro bwe.

⁷ Uwazana ngo umukiro wa Israheli uturuke kuri Siyoni! Igihe Uhoraho azagarukira umuryango we, bene Yakobo bazasagwa n’ibyishimo, bene Israheli banezerwe bitavugwa!