Zaburi 139 - Kinyarwanda Bibiliya Ntagatifu

Uhoraho aba hose kandi akamenya byose

1 Igenewe umuririmbisha. Ni zaburi iri mu zo bitirira Dawudi.

¹ Igenewe umuririmbisha. Ni zaburi iri mu zo bitirira Dawudi. Uhoraho, undeba mu nkebe z’umutima, ukamenya wese;

² iyo nicaye n’iyo mpagaze, byose uba ubizi, imigambi yanjye uyimenya mbere y’igihe;

³ iyo ngenda n’iyo ndyamye, byose uba ubiruzi neza, mu migenzereze yanjye yose nta na kimwe kigusoba.

⁴ Ijambo riba ritarangera ku rurimi, woweho, Uhoraho, ukaba warimenye kare ryose.

⁵ Ari imbere, ari n’inyuma yanjye, hose uba uhari, maze ukantwikiriza ikiganza cyawe.

⁶ Bene ubwo bumenyi bumbera urujijo bukandenga; burajimije by’ihabu ku buryo ntabasha kubushyikira.

⁷ Najya hehe kure y’uruhanga rwawe? Nahungira hehe kure y’amaso yawe?

⁸ N’aho nazamuka ku ijuru, uba uhari! N’aho narigita nkaryama ikuzimu, uba uhari!

⁹ N’aho namera amababa nk’ay’umuseke weya, maze nkajya kwiturira ku mpera y’inyanja,

¹⁰ n’aho ngaho ukuboko kwawe ni ko kuhanjyana, indyo yawe ntigire ubwo indekura.

¹¹ Wenda nava aho nibwira nti «Nibura umwijima wo uzantwikira, maze amanywa ahinduke nk’ijoro rinkikije!»

¹² Nyamara kuri wowe, n’ahatabona ntihakubera umwijima, n’ijoro ubwaryo rirabonesha, uboshye amanywa.

¹³ Ni wowe waremye ingingo zanjye, umbumbabumbira mu nda ya mama.

¹⁴ Ndagushimira ko wandemye ku buryo buhimbye, ibikorwa byawe biratangaje: umutima wanjye urabizi neza rwose.

¹⁵ Amagufwa yanjye ntiyakwikinze, igihe naremerwaga mu ibanga, nkaremwaremwa mu nda ya mama.

¹⁶ Nkiri n’urusoro, amaso yawe yarambonaga; iminsi wangeneye yose yari isanzwe yanditse mu gitabo cyawe, na mbere yuko umwe muri yo utangira kubaho.

¹⁷ Mana yanjye, mbega ngo ibitekerezo byawe birandenga, n’umubare wabyo ukambera urujijo!

¹⁸ Iyo niyumije ngo ndabibarura, nsanga biruta umusenyi ubwinshi; nakeka ko mbirangije, ngasanga ukindenze!

¹⁹ Mbe Mana, wakuyeho umugiranabi, n’abamena amaraso bakigira kure yanjye!

²⁰ Dore abanzi bawe bitwaje izina ryawe bagamije kubeshya, bakarivuga bagambiriye kugira nabi.

²¹ Uhoraho, nabura nte kwanga abakwanga? Nabura nte kuzinukwa abakurwanya?

²² Dore mbanga urunuka, babaye abanzi banjye bwite.

²³ Mana yanjye, ngenzura ugeze mu nkebe z’umutima wanjye; nsuzuma, maze umenye ibyo mpirimbanira.

²⁴ Urebe niba ntari mu nzira mbi, maze ungarure mu nzira wigishije kuva kera!