Zaburi 137 - Kinyarwanda Bibiliya Ntagatifu

Amaganya y’uwajyanywe bunyago mu mahanga kure y’Ingoro y’Uhoraho

¹ Ku nkombe z’inzuzi z’i Babiloni, ni ho twicaraga, maze tukarira iyo twibukaga Siyoni.

² Mu mashami y’imizibaziba yaho, ni ho twamanikaga inanga zacu.

³ Ni bwo abari baratwigaruriye badusabaga kubaririmbira, n’abatwicishaga agahato, bakatwinginga ngo tubabyinire, bagira bati «Nimuturirimbire akaririmbo k’i Siyoni.»

⁴ Twaririmba dute indirimbo y’Uhoraho mu gihugu cy’amahanga?

⁵ Yeruzalemu, ningira ubwo nkwibagirwa, indyo yanjye izumirane!

⁶ Ururimi rwanjye ruzumire mu gisenge cy’akanwa, niba ndetse kukuzirikana, niba ntagize Yeruzalemu imena mu binshimisha!

⁷ Uhoraho, urajye wibuka abahungu ba Edomu, ku munsi wa Yeruzalemu, bo bavugaga ngo «Nimuyirandurane n’imizi n’imiganda!»

⁸ Yewe, mwari wa Babiloni, wayogoje ibihugu, hahirwa uzakwihimura ibyago waduteye!

⁹ Hahirwa uzasumira ibitambambuga byawe, maze akabihondagura ku rutare!