Zaburi 135 - Kinyarwanda Bibiliya Ntagatifu

Igisingizo cy’Uhoraho Umwami wa byose

¹ Alleluya! Nimusingize izina ry’Uhoraho, nimumusingize, bagaragu b’Uhoraho,

² mwebwe abahora mu Ngoro y’Uhoraho, mu bikari by’Inzu y’Imana yacu.

³ Nimusingize Uhoraho, kuko ari umunyampuhwe, nimuririmbe izina rye, kuko ari umugwaneza.

⁴ Koko Uhoraho yihitiyemo Yakobo, Israheli ayigira inyarurembo ye.

⁵ Jyewe nzi neza ko Uhoraho ari igihangange, ko Umutegetsi wacu asumba ibigirwamana byose.

⁶ Icyo Uhoraho ashatse cyose, aragikora, ari mu ijuru, ari no mu nsi, ari mu nyanja, ari n’ikuzimu . .

⁷ Atumburutsa ibicu abivanye iyo gihera, akarekura imirabyo imvura ikagwa, akabyutsa imiyaga mu ndiri yayo.

⁸ Ni we warimbuye ibyavutse uburiza mu Misiri, ari ubw’abantu, ari n’ubw’amatungo.

⁹ Yohereje ibimenyetso n’ibitangaza, iwawe mu Misiri nyir’izina, arwanya Farawo n’abagaragu be bose.

¹⁰ Ni we watsinze amahanga menshi, yica n’abami b’ibihangange,

¹¹ barimo Sihoni, umwami w’Abahemori, na Ogi, umwami wa Bashani, n’ingoma zose za Kanahani;

¹² nuko igihugu cyabo agitangaho umunani, umunani yageneye Israheli, umuryango we.

¹³ Uhoraho, izina ryawe rizavugwa iteka, uzahora wibukwa n’imbyaro zose,

¹⁴ kuko Uhoraho arenganura umuryango we, akagirira impuhwe abagaragu be.

¹⁵ Ibigirwamana by’amahanga ni feza na zahabu, ni ibintu byabumbwe n’intoki za muntu.

¹⁶ Bifite umunwa, ariko ntibivuge, bikagira amaso, ariko ntibibone;

¹⁷ bifite amatwi, ariko ntibyumve, nta mwuka na busa ubiva mu kanwa!

¹⁸ Ababikoze barakamera nka byo, kimwe n’ababyiringira bose!

¹⁹ Mwebwe abo mu nzu ya Israheli, nimusingize Uhoraho, mwebwe abakomoka kuri Aroni, nimusingize Uhoraho,

²⁰ mwebwe abo mu bwoko bwa Levi, nimusingize Uhoraho, mwebwe abatinya Uhoraho, nimusingize Uhoraho!

²¹ Uhereye i Siyoni nihasingizwe Uhoraho, we uganje muri Yeruzalemu!