Zaburi 127 - Kinyarwanda Bibiliya Ntagatifu

Uhoraho ni we soko y’ibyiza byose

1 Indirimbo y’amazamuko. Iri mu zo bitirira Salomoni.

¹ Indirimbo y’amazamuko. Iri mu zo bitirira Salomoni. Niba Uhoraho atari we wubatse inzu, ba nyir’ukuyubaka baba bagokera ubusa. Niba Uhoraho atari we urinze umugi, abanyezamu bawo baba bagokera ubusa.

² N’aho mwabyuka mu gitondo cya kare kare, n’aho mwaryama mukesheje, mukanahirimbana mushaka ibibatunga, na bwo mwaba mugokera ubusa; ibyo byose Uhoraho abiha umukunzi we wisinziriye!

³ Ni ukuri koko, abana umuntu abyaye ni ingabire y’Uhoraho, abuzukuru n’abuzukuruza ni ingororano imuturukaho.

⁴ Abana umuntu abyariye mu busore, bameze nk’imyambi mu ntoki z’uri ku rugamba.

⁵ Hahirwa umuntu wayujuje mu mutana we! Nta bwo azaheranwa n’abanzi be, igihe azaba akotana na bo ku irembo ry’umugi.