Zaburi 122 - Kinyarwanda Bibiliya Ntagatifu

Ibyishimo byo kujya mu Ngoro y’Imana

1 Indirimbo y’amazamuko. Iri mu zo bitirira Dawudi.

¹ Indirimbo y’amazamuko. Iri mu zo bitirira Dawudi. Mbega ibyishimo nagize igihe bambwiye, bati «Ngwino tujye mu Ngoro y’Uhoraho!»

² None urugendo rwacu rutugejeje ku marembo yawe, Yeruzalemu!

³ Yeruzalemu, uri umurwa wubatse neza, umugi ucinyiye cyane.

⁴ Aho ni ho imiryango ya Israheli, imiryango y’Uhoraho iza mu mutambagiro, gusingiza Uhoraho uko Israheli yabitegetswe.

⁵ Aho ni ho hari intebe y’ukomoka kuri Dawudi, intebe yicaraho igihe aca imanza.

⁶ Nimwifurize Yeruzalemu amahoro, muti «Abagukunda bose baragahorana ituze;

⁷ amahoro naganze mu nkike zawe, n’ituze rikwire mu rugo rwawe!»

⁸ Kubera abavandimwe banjye n’incuti zanjye, mpimbajwe no kukubwira nti «Amahoro naganze iwawe!»

⁹ Kubera Ingoro y’Uhoraho Imana yacu, nkwifurije ishya n’ihirwe!