Zaburi 113 - Kinyarwanda Bibiliya Ntagatifu

Umuvugo urata Imana isumba byose kandi yita ku bantu

¹ Alleluya! Bayoboke b’Uhoraho, nimuhanike ibisingizo, maze musingize izina ry’Uhoraho!

² Izina ry’Uhoraho nirisingizwe, ubu ngubu n’iteka ryose!

³ Kuva igihe izuba rirashe kugeza ubwo rirenga, nihasingizwe izina ry’Uhoraho!

⁴ Uhoraho asumba kure amahanga yose, n’ikuzo rye rigasumba ijuru.

⁵ Ni nde wamera nk’Uhoraho Imana yacu, we utetse ijabiro hejuru iyo gihera,

⁶ maze akunama areba ijuru n’isi hasi ye?

⁷ Ahagurutsa indushyi mu mukungugu, akavana umutindi mu cyavu,

⁸ kugira ngo amwicaze hamwe n’abakomeye, abakomeye bo mu muryango we.

⁹ Umugore wari ingumba amushakira inzu, akamugira umubyeyi wizihiwe mu bana be.