Zaburi 109 - Kinyarwanda Bibiliya Ntagatifu

Imivumo

1 Igenewe umuririmbisha. Ni zaburi iri mu zo bitirira Dawudi.

¹ Igenewe umuririmbisha. Ni zaburi iri mu zo bitirira Dawudi. Mana wowe nsingiza, wikomeza kwinumira!

² Kuko abanyakarimi kabi n’abanyabinyoma bakokereza ari jye bibasiye, bakamvugisha bandyarya.

³ Amagambo yabo y’urwango yanturutse impande zose, maze bakandwanya nta mpamvu.

⁴ Umubano mwiza nabagiriye bawitura ibirego, nyamara jyewe nkavuga amasengesho mbasabira.

⁵ Ineza mbagirira bayitura inabi, ubucuti mbagaragariza bakabwitura urwango.

⁶ «Mushakire umugome umuhagarara iburyo, maze amushinje!

⁷ Urubanza aburana, nirurangire atsinzwe ruhenu, maze najurira bimuviremo icyaha!

⁸ Iminsi ye yo kubaho irabe mikeya, imirimo yari ashinzwe ihabwe undi,

⁹ abahungu be bahinduke impfubyi, n’umugore we abe umupfakazi!

¹⁰ Abahungu be barabe inzererezi n’abasabirizi, maze birukanwe mu matongo yabo;

¹¹ uwo yari abereyemo umwenda arakukumbe ibyo yungutse; abavamahanga basahure ibyo yaruhiye!

¹² Ntihakagire n’umwe umubera indahemuka, ntihakabe n’umwe ugirira ibambe impfubyi asize;

¹³ urubyaro rwe rurakarimbuka, izina rye risibangane mu gisekuru kimwe gusa!

¹⁴ Ibicumuro by’ababyeyi be biributswe Uhoraho, icyaha cy’umukecuru we cyoye guhanagurika.

¹⁵ Ibyo byose ntibigasobe Uhoraho, maze atsembe ku isi icyatuma babibuka cyose!

¹⁶ Ubwo uwo muntu atagira agatima k’imbabazi, agatoteza umukene ngo amwice, akibasira umutindahare wasumbirijwe,

¹⁷ akanogerwa no kuvuma, yokokamwa n’umuvumo we, ntashake gutunga umugisha, yokabura umugisha.

¹⁸ Ubwo yambaye umuvumo nk’igishura, ukamucengeramo nk’amazi, ugacengera mu mubiri we nk’amavuta,

¹⁹ uwo muvumo urakamubera nk’umwambaro yambaye, umubere nk’umukandara ahora akindikije!»

²⁰ Nguko uko Uhoraho azitura abandega, kimwe n’abamvuga nabi bose.

²¹ Naho wowe, Nyagasani, Mana yanjye, ndengera ugiriye izina ryawe; ubudahemuka bwawe burangwa no kugira neza, none nyirokorera.

²² Ndi umukene n’umutindahare, n’umutima wanjye wankomerekeye mu nda.

²³ Ndarembera nk’igicucu kijya kurenga, barampinda nk’abirukana inzige.

²⁴ Sinkibasha guhagarara bitewe no kubura icyo ndya, n’umubiri wanjye wanyunyujwe no kutagira ibinure.

²⁵ Kuri bo nabaye insuzugurwa bikabije, iyo bambonye barajiginywa.

²⁶ Ntabara, Uhoraho, Mana yanjye, nkiza ukurikije impuhwe zawe;

²⁷ maze bamenye ko ari wowe wakinze ukuboko, bamenye ko ari wowe, Uhoraho, ukora byose.

²⁸ Bo baravuma, wowe ugatanga umugisha: bari banteye, ariko baracemererwa, maze umuyoboke wawe arishima.

²⁹ Abandegaga nibicwe n’ipfunwe, bamanjirwe, isoni bafite zibisesureho nk’igishura.

³⁰ Nzamamaza Uhoraho ndanguruye ijwi, nzamusingirize hagati y’imbaga y’abantu;

³¹ kuko ahagarara iburyo bw’umutindahare, kugira ngo amukize abamucira urubanza.