Zaburi 106 - Kinyarwanda Bibiliya Ntagatifu

Ineza Imana yagiriye Israheli, n’ubuhemu Israheli yayituye

¹ Alleluya! Nimusingize Uhoraho, kuko ari umugwaneza, kandi urukundo rwe rugahoraho iteka!

² Ni nde wavuga ibigwi by’Uhoraho, akamamaza ibisingizo bye byose?

³ Hahirwa abita ku mategeko y’Uhoraho, igihe cyose bagakurikiza ubutabera!

⁴ Uhoraho, uranyibuke, wowe ugirira neza umuryango wawe, maze uze untabare,

⁵ kugira ngo niyumvemo ihirwe ry’intore zawe, mpimbazwe n’ibyishimo by’umuryango wawe, nsangire umunezero n’abo wagize ingarigari zawe!

⁶ Koko twaracumuye nk’abasekuruza bacu, twaragomye duteshuka inzira!

⁷ Abasekuruza bacu mu Misiri ntibigeze bumva ibitangaza byawe; biyibagije impuhwe zawe nyinshi, bivumbura ku Musumbabyose hafi y’inyanja y’Urufunzo.

⁸ Nyamara we, agirira izina rye arabarokora, kugira ngo yerekane ubushobozi bwe.

⁹ Akangara inyanja y’Urufunzo, maze irumuka; abanyuza mu ndiri yayo, bayigendamo nk’uko bagenda mu butayu.

¹⁰ Yabakijije abari babibasiye, abagobotora mu nzara z’umwanzi;

¹¹ amazi arenga ku banzi babo, ntihasigara n’umwe;

¹² nuko bemera ijambo ry’Uhoraho, baririmba ibisingizo bye.

¹³ Ariko ntibatindiganyije kwibagirwa ibikorwa bye, ndetse ntibarindira ko yuzuza umugambi we;

¹⁴ batangira kurarikira ibyo badafite, maze bagondoza Uhoraho mu butayu;

¹⁵ na we abaha ibyo bifuzaga, ariko bibatera umurengwe.

¹⁶ Hanyuma bagiriye Musa ishyari mu ngando, na Aroni, intungane y’Uhoraho;

¹⁷ nuko isi irasama, imira Datani, iyongobeza n’abo mu ishyaka rya Abiramu;

¹⁸ umuriro utwika igico cyabo, ikibatsi cyawo gitsemba abo bagiranabi.

¹⁹ Kuri Horebu bacuze inyana, bapfukama imbere y’icyo cyuma;

²⁰ Uhoraho, we kuzo ryabo, bamusimbuza ishusho ry’ikimasa kirisha ubwatsi!

²¹ Bibagiwe batyo Uhoraho, umukiza wabo, we wakoreye mu Misiri ibintu bikomeye,

²² ibitangaza mu gihugu cya Kamu, n’akataraboneka ku nyanja y’Urufunzo.

²³ Yari mu migambi yo kubatsemba, iyo Musa, intore ye, atamwitambika imbere, ngo abuze ubukana bwe kubarimbura.

²⁴ Nyuma birozonze igihugu cyiganjemo ibyiza, ntibizera ijambo rye;

²⁵ bijujutira mu mahema yabo, ntibumvira ijwi ry’Uhoraho.

²⁶ Ni bwo abanguye ukuboko ararahira ko azabararika mu butayu,

²⁷ akazatatanya inkomoko yabo, bakazagwa mu bihugu by’amahanga.

²⁸ Nyuma bohotse kuri Behali w’i Pewori, biha kurya ku nyama zatuwe abazimu;

²⁹ imigenzereze yabo ishavuza Uhoraho, maze icyorezo kibadukamo.

³⁰ Ubwo ngubwo Pineyasi arahaguruka, arabahana, maze icyorezo kirahosha;

³¹ ibyo bimuviramo ubutungane ku Mana, bwamuranzweho mu mbyaro zose zakurikiye.

³² Bagomeye Uhoraho ku mazi y’i Meriba, batuma Musa ahagirira akaga;

³³ bamutesheje umutwe, maze avuga ibiterekeranye.

³⁴ Ntibatsembye ya miryango Uhoraho yari yababwiye;

³⁵ ahubwo bivangavanze n’abanyamahanga, maze biha gukurikiza imico yabo.

³⁶ Bagaragiye ibigirwamana byabo, maze bibagusha mu mutego;

³⁷ abahungu babo n’abakobwa babo, babaturaho ibitambo by’ibigirwamana!

³⁸ Koko bamennye amaraso y’abatacumuye, bamena amaraso y’abahungu babo n’ay’abakobwa babo batambiriwe ibigirwamana by’i Kanahani; nuko igihugu cyanduzwa n’umuvu w’ayo maraso.

³⁹ Barihumanyije kubera ibyo bakora, imigenzereze irabandarika;

⁴⁰ nuko uburakari bw’Uhoraho bugurumanira umuryango we, azinukwa abo yari yaragize abe.

⁴¹ Ni ko kubagabiza ibiganza by’abanyamahanga, maze ababangaga, barabigarurira;

⁴² abanzi babo babisha agahato, bashikamirwa n’ikiganza cyabo.

⁴³ Kenshi na kenshi Uhoraho yarabagobotoraga, ariko bo bagakomeza kumugomera, bakarushaho gusaya mu cyaha cyabo.

⁴⁴ Nyamara Uhoraho yareba akaga barimo, akumva amaganya yabo;

⁴⁵ yazirikana isezerano yari yarabagiriye, ubudahemuka bwe bukamutera kwisubiraho;

⁴⁶ maze abari barabigaruriye bose, akabatera kubagirira impuhwe.

⁴⁷ Uhoraho, Mana yacu, dukorakoranye, utuvane mu bihugu by’amahanga, maze tuzahimbaze izina ryawe ritagatifu, twizihirwe no kugusingiza.

⁴⁸ Haragasingizwa Uhoraho, Imana ya Israheli, kuva iteka n’iteka ryose! Maze imbaga yose izavuge iti «Amen!»