Zaburi 104 - Kinyarwanda Bibiliya Ntagatifu

Uburanga bw’Umuremyi bwishushanyije mu biremwa bye

¹ Mutima wanjye, singiza Uhoraho! Uhoraho, Mana yanjye, uri igihangange rwose! Wisesuyeho icyubahiro n’ububengerane,

² wambaye urumuri nk’igishura, urambura ijuru nk’ihema.

³ Hejuru y’amazi wahubatse Ingoro yawe, ibicu ubigira igari ryawe, ugatambagirira ku mababa y’umuyaga.

⁴ Imiyaga wayigize intumwa zawe, umuriro uwugira umufasha wawe.

⁵ Isi wayiteretse mu kibanza cyayo, ntizigera na rimwe ihungabana.

⁶ Wayisesuyeho inyanja nk’umwambaro, amazi yayo agomererwa hejuru y’imisozi.

⁷ Iyo uyakangaye arahunga, ku ijwi ry’inkuba zawe akicubura;

⁸ aharamba imisozi, akamanuka imibande, yerekeje ahantu wayageneye.

⁹ Wahashinze umupaka atagomba kurenga, ku buryo atazongera kurengera ubutaka.

¹⁰ Uvubukisha amasoko y’amazi mu myoma, agatemba hagati y’imisozi;

¹¹ akuhira inyamaswa zose zo mu gasozi, indogobe z’ishyamba zikahashirira inyota;

¹² hafi yayo inyoni zo mu kirere zihubaka ibyari, zikaririmba zibereye mu mashami.

¹³ Imisozi uyivomerera uri hejuru iyo, isi ukayihaza imbuto z’ibikorwa byawe;

¹⁴ umeza ubwatsi bw’amatungo, n’imyaka muntu ahinga, maze ubutaka bukamuha ikimutunga,

¹⁵ na divayi ihimbaza umutima wa mwene muntu, kimwe n’amavuta amukesha uruhanga, n’umugati uramira imbaraga ze.

¹⁶ Ibiti by’Uhoraho bifite amazi abihagije, kimwe n’amasederi yateye yo muri Libani;

¹⁷ aho ni ho inyoni zarika, maze itanangabo ikiturira mu mizonobari.

¹⁸ Imisozi miremire ni iy’ihene z’agasozi, amasenga yo mu bitare akaba ubwikingo bwa nyiramuhari.

¹⁹ Ukwezi yakuremeye kuranga ibihe, izuba rikamenya igihe rirengera.

²⁰ Uzana umwijima, maze hakaba ijoro, inyamaswa z’ishyamba zikayagara;

²¹ ibyana by’intare bigatontoma bishaka icyo bifata, maze bigasaba Imana icyo birya.

²² Izuba ryarasa bikitahira, bikajya kubunda mu ndiri yabyo.

²³ Noneho muntu agasohoka iwe ajya gukora, akajya guhinga kugeza bwije.

²⁴ Uhoraho, mbega ngo ibikorwa byawe biraba byinshi! Byose wabikoranye ubwitonzi, isi yuzuye ibiremwa byawe!

²⁵ Ngiyo inyanja ngari, kandi yagutse impande zose, maze inyamaswa zitabarika, inini n’intoya, zikayijagatamo.

²⁶ Ni na ho amato magari acuragana, na cya Leviyatani waremeye kuhadabagirira.

²⁷ Byose ni wowe byiringira, biteze ko ubiha icyo kurya mu gihe gikwiye;

²⁸ urabiha bikayoragura, wabumbura ikiganza cyawe, bigahaga ibyiza.

²⁹ Uhisha uruhanga rwawe bigakangarana; wabivanamo umwuka bigahwera, bigasubira mu mukungugu byavuyemo.

³⁰ Wohereza umwuka wawe, bikaremwa, maze imisusire y’isi ukayihindura mishya.

³¹ Ikuzo ry’Uhoraho riragahoraho ubuziraherezo! Uhoraho arakishimira ibikorwa bye!

³² We ureba isi, maze igahinda umushyitsi, yakorakora imisozi igacumba umwotsi!

³³ Nzaririmba Uhoraho, mu buzima bwanjye bwose, iminsi yose nkiriho nzacurangire Imana yanjye.

³⁴ Icyampa ngo umuvugo wanjye umunyure, maze Uhoraho ambere isoko y’ibyishimo!

³⁵ Abanyabyaha nibakendere ku isi, maze abagiranabi bekubaho ukundi! Mutima wanjye, singiza Uhoraho!