Zaburi 102 - Kinyarwanda Bibiliya Ntagatifu

Isengesho ry’igihe cy’amakuba

¹ Isengesho ry’umunyabyago igihe adandabiranye, maze agatura Imana amaganya ye.

² Uhoraho, umva isengesho ryanjye, induru yanjye nikugereho!

³ Ntukampishe uruhanga rwawe umunsi nasumbirijwe; jya untega amatwi igihe ngutabaje, maze wihutire kunsubiza!

⁴ Koko iminsi yanjye irayoyoka nk’umwotsi, n’amagufwa yanjye agakongoka nk’inkekwe y’umuriro.

⁵ Umutima wanjye urarabirana nk’ubwatsi batemye, bikanyibagiza no kurya umugati wanjye.

⁶ Aho ndi hose mpora nganya, ku buryo nsigaye ndi uruhu rusa.

⁷ Ndasa na sakabaka yo mu butayu, meze nk’igihunyira cyo mu matongo;

⁸ ndara ntagohetse nk’inyoni yigungiye hejuru y’inzu.

⁹ Umunsi wose abanzi banjye barantuka, barankwena, bakampigira.

¹⁰ Ivu nsigaye ndirya nk’umugati, ibyo nywa nkabivanga n’amarira,

¹¹ ku mpamvu y’uburakari n’ubukana bwawe, waranteruye maze uranjugunya.

¹² Iminsi yanjye irarembera nk’igicucu, kandi ndumirana nk’ibyatsi.

¹³ Nyamara wowe, Uhoraho, uri umwami ubuziraherezo, kandi imbyaro zose zizahora zikwibuka!

¹⁴ Uzahagurutswa n’urukundo ufitiye Siyoni, kuko ari igihe cyo kuyigirira imbabazi, ayo magingo akaba ageze.

¹⁵ Abagaragu bawe batewe ubwuzu n’amabuye yayo, bagashavuzwa n’itongo ryayo.

¹⁶ Amahanga yose azatinya izina ry’Uhoraho, n’abami bose b’isi bazatinye ikuzo ryawe,

¹⁷ kuko Uhoraho azubaka Siyoni bundi bushya, akahigaragariza yuje ikuzo;

¹⁸ ubwo agahugukira isengesho ry’abanyazwe ibyabo, akita ku byo bamusaba.

¹⁹ Ibyo ngibyo nibyandikirwe igisekuruza kizaza, maze umuryango mushya uzasingize Uhoraho;

²⁰ kuko Uhoraho yarungurukiye mu bushorishori bw’ijuru, aho ari mu Ngoro ye, akareba ku isi,

²¹ kugira ngo yumve amaganya y’imfungwa, kandi abohore abaciriwe urwo gupfa.

²² Nuko bazamamaze muri Siyoni izina ry’Uhoraho, n’ibisingizo bye muri Yeruzalemu,

²³ igihe ingoma n’amahanga bizibumbira hamwe, kugira ngo bigaragire Uhoraho!

²⁴ Yacogoreje imbaraga zanjye mu nzira, agerura iminsi yanjye!

²⁵ Ndavuga nti «Mana yanjye, ntunkureho ncagashije iminsi yanjye!» Imyaka yawe isumba ibisekuruza byose.

²⁶ Kera wahanze isi, kandi ijuru ni igikorwa cy’ibiganza byawe.

²⁷ Byo bizashira, ariko wowe uzahoraho, byose bizasaza nk’umwambaro, ubihindure nk’uko bahindura umwenda;

²⁸ ariko wowe uzahora uri wa wundi, n’imyaka yawe ntizagira iherezo!

²⁹ Abahungu b’abagaragu bawe bazatura, maze ababakomokaho bazarambe imbere yawe.