Zaburi 10 - Kinyarwanda Bibiliya Ntagatifu

(ni iya 9 igikomeza) Lamedi

Lamedi

¹ Nyagasani, ni iki gituma witaza, ukihisha mu bihe by’amage?

² Mu gihe umugiranabi yigamba, indushyi zifatirwa mu mutego yazishandikiye.

Memu

Memu

³ Umugiranabi yirata ko yageze ku ntego ye, kuba yabonye icyo yifuzaga bigatuma atuka Uhoraho akamusuzugura.

Nuni

Nuni

⁴ Umugiranabi ashinga ijosi, agaterera agati mu ryinyo, ngo «Nta Mana ibaho!» Ngubwo ubwenge bwe.

⁵ Igihe cyose ibyo akora biramuhira; n’ubucamanza bwawe buramurenze, abanzi be akabasuzugura bikabije.

Sameki

Sameki

⁶ Akunda kwibwira ngo «Ndi indatsimburwa, no mu bihe bizaza nta cyago kizankoraho.»

Pe

Pe

⁷ Akanwa ke kuzuye imivumo, ibinyoma n’uburyarya, ajunditse ubugiranabi n’ubugome.

⁸ Yubikira hafi y’insisiro, akihishahisha ngo yice intungane; agahora agenza umunyantege nke.

Ayini

Ayini

⁹ Arubikira nk’intare ibunze mu gihuru; akubikira ngo asumire umunyabyago, agasumira umunyabyago amuroha mu mutego we.

Tsade

Tsade

¹⁰ Arabanza akabunda, agatega, maze uko yakabaye akiroha ku banyantege nke,

¹¹ yibwira ati «Imana ntibyitaho, yahishe uruhanga rwayo, nta cyo yigera ibona.»

Kofu

Kofu

¹² Uhoraho, haguruka! Mana, kinga ukuboko, woye kwibagirwa abanyabyago!

¹³ Kuki umugiranabi yasuzugura Imana, akagenda yibwira ngo nta cyo uzamutwara?

Reshi

Reshi

¹⁴ Nyamara wowe ubona ishavu n’amarira, maze ukiyemeza kubyitaho; umunyantege nke arakwiragiza, kandi n’imfubyi ukayitabara.

Shini

Shini

¹⁵ Burizamo ububasha bw’umugiranabi, umuryoze ububi bw’ibyo yakoze, he kuboneka n’agasigisigi k’ubugome bwe.

¹⁶ Uhoraho ni Umwami w’ibihe byose, abatamuzi bashize mu gihugu cye.

Tawu

Tawu

¹⁷ Uhoraho, wumva ibyifuzo by’abiyoroshya, ukabakomeza umutima, ugahora ubateze amatwi,

¹⁸ maze imfubyi n’abaryamirwaga ukabakiranura, kugira ngo ku isi hatazagira umuntu wongera kwigira umuhinza.