Zaburi 1 - Kinyarwanda Bibiliya Ntagatifu

Inzira ebyiri mu kubaho k’umuntu

¹ Hahirwa umuntu udakurikiza inama y’abagiranabi, akirinda inzira y’abanyabyaha, kandi ntiyicarane n’abaneguranyi,

² ahubwo agahimbazwa n’amategeko y’Uhoraho, akayazirikana umunsi n’ijoro!

³ Ameze nk’igiti cyatewe iruhande rw’umugezi, kikera imbuto uko igihe kigeze, kandi amababi yacyo ntagire ubwo arabirana; uwo muntu ibyo akora byose biramuhira.

⁴ Naho ku bagiranabi si uko bigenda: bo bameze nk’umurama uhuhwa n’umuyaga.

⁵ Ni cyo gituma ku munsi w’urubanza batazegura umutwe, n’abanyabyaha ntibazajye mu iteraniro ry’intungane.

⁶ Kuko Uhoraho yita ku nzira y’intungane, naho inzira y’abagiranabi ikagusha ruhabo.