Yoweli 4 - Kinyarwanda Bibiliya Ntagatifu

2. IMANA ICIRA URUBANZA AMAHANGA

¹ Koko rero, muri iyo minsi no muri icyo gihe, ubwo nzaba nagaruye Yuda na Yeruzalemu,

² nzakorakoranya amahanga yose, nyamanurire mu kibaya cyitwa «Uhoraho mucamanza». Aho ni ho nzayacira urubanza kubera Israheli, umuryango wanjye n’umurage wanjye, kuko bawutatanyirije mu bihugu by’amahanga, bakigabanya igihugu cyanjye.

³ Umuryango wanjye bawukoreyeho ubufindo, abahungu bawo babagurana indaya, bagacuruza abakobwa bawo, ngo babone divayi yo kunywa!

Ibyo Tiri, Sidoni n’Ubufilisiti bishinjwa

⁴ Mwebwe se, Tiri na Sidoni, n’intara zose z’Ubufilisiti, icyo munshakaho ni iki? Murashaka se kunyihimura? Nyamara niba mushaka kunyihimura, ubwo bwihimure nzabubagaruraho vuba na bwangu, bube ari mwe bugaruka!

⁵ Kubera ko mwatwaye feza yanjye na zahabu yanjye, mugashyira mu ngoro zanyu ibyanjye by’agaciro,

⁶ kubera ko mwagurishije abaturage ba Yeruzalemu, mukabagura n’Abagereki, bakajya kure y’igihugu cyabo,

⁷ ubu jyewe ngiye kubagarura mbavanye aho mwabagurishije, maze mwebwe mbaryoze ibikorwa bibi byanyu!

⁸ Nzagurisha abahungu n’abakobwa banyu begukanwe n’abaturage ba Yuda, na bo bazabagure n’Abanyesaba, mu mahanga ya kure.» Uwo ni Uhoraho ubivuze.

Urugamba rwa nyuma n’urubanza by’imperuka

⁹ Nimutangaze ibi ngibi mu mahanga, mugira muti «Nimwitegure intambara! Mukoranye ab’intwari! Nibigire hafi abamenyereye intambara bose, maze bazamuke!

¹⁰ Amasuka yanyu nimuyacuremo inkota, imihoro yanyu muyicuremo amacumu, umunyantege nke nagire ati ’Ndi intwari!’

¹¹ Nimubanguke mwebwe mwese, mahanga adukikije, maze mukoranire hariya!» Uhoraho, ohereza intwari zawe zimanuke!

¹² Amahanga nahaguruke, azamuke, agane ku kibaya cyitwa ’Uhoraho mucamanza’, kuko ari ho ngiye kwicara, ngacira urubanza amahanga yose abakikije.

¹³ Nimucyamure umuhoro kuko isarura rigeze; nimuze mwenge, dore urwengero ruruzuye, n’imivure irasendereye, kuko ubugome bwabo bukabije!

¹⁴ Ngizo inteko z’imbaga nyamwinshi mu kibaya cy’imanza, kuko Umunsi w’Uhoraho wegereje, ukazahigaragariza.

¹⁵ Izuba n’ukwezi bizijima, n’inyenyeri ntizizongera kumurika.

¹⁶ Uhoraho yivugiye i Siyoni, ijwi rye ryumvikanira i Yeruzalemu; nuko ijuru n’isi birakangarana! Naho umuryango we Uhoraho azawubera ubuhungiro, abe n’ubwihisho ku Bayisraheli.

¹⁷ Bityo muzamenya ko ndi Uhoraho, Imana yanyu, nkaba ntuye i Siyoni ku musozi wanjye mutagatifu. Yeruzalemu izaba ahantu hatagatifu, abanyamahanga ntibazongera kuhanyura ukundi!

3. ISRAHELI IZONGERA KUBAHO MU MUDENDEZO

¹⁸ Uwo munsi, imisozi izarengwa divayi nshyashya, imisozi itembeho amata, amazi atembe mu migezi yose ya Yuda. Isoko izavubuka mu Ngoro y’Uhoraho, ivomerere ikibaya cy’Iminyinya.

¹⁹ Misiri yo izaba ikidaturwa, na Edomu ihinduke ubutayu, bazize ubugome bagiriye abahungu ba Yuda, kuko bameneye amaraso y’indacumura mu gihugu cyazo.

²⁰ Naho Yuda na Yeruzalemu bizaturwa ubuziraherezo, uko ibihe bigenda bisimburana.

²¹ Ni koko: nzahora amaraso yabo yamenwe, nta we uzasigara adahorewe, maze jyewe, Uhoraho, nzature muri Siyoni.