Yoweli 1 - Kinyarwanda Bibiliya Ntagatifu

¹ Dore ijambo Uhoraho yabwiye Yoweli, mwene Petuweli.

I. IGITERO CY’INZIGE 1. ICYUNAMO N’UGUTAKAMBA Amaganya atewe n’irimbuka ry’igihugu

² Nimwumve ibi ngibi, mwe bakuru b’umuryango, mutege amatwi, mwebwe mwese abatuye igihugu! Ibintu nk’ibi hari ibyigeze bibaho, ari mu gihe cyanyu, cyangwa se mu gihe cy’abasokuruza banyu?

³ Nimubitekerereze abana banyu, abana banyu babitekerereze ababo, na bo bazabitekerereze ab’igisekuru kizaza!

⁴ Ibyo insanane zasize, byariwe n’inzige; ibyo inzige zisize, biribwa n’indahaga; ibyo indahaga zishigaje, na byo biribwa n’ibihore.

⁵ Nimukanguke, mwa basinzi mwe, nimurire kandi muboroge, mwebwe mwese abanywi ba divayi, kubera divayi nshyashya mutacyongeye gukoza mu kanwa!

⁶ Dore ingabo ziteye igihugu cyanjye, ni imbaga y’indatsimburwa kandi itabarika; amenyo yazo ni nk’ay’intare, zifite n’inzasaya nk’iz’intare y’ingore.

⁷ Umuzabibu wanjye ziwuhinduye ubutayu, imitini yanjye zirayivunagura; zirayikokora ziyiragarika hasi, amashami yayo asigara ari imyeru!

⁸ Ganya, nk’inkumi yapfushije umusore wayisabye, ikamuririra yambaye ikigunira.

⁹ Amaturo n’ibitambo byaciwe mu Ngoro y’Uhoraho, abaherezabitambo bashinzwe umurimo w’Uhoraho bari mu cyunamo.

¹⁰ Imirima yayogojwe, ubutaka buri mu cyunamo, ingano zononekaye, divayi yabuze n’amavuta mashyashya yakamye.

¹¹ Bahinzi, nimwumirwe; bene imizabibu, muboroge; muririre ingano nini n’iza bushoki: kuko umusaruro wo mu mirima wangiritse.

¹² Umuzabibu warabiranye, umutini urumirana, imikomamanga, imikindo, amapera, mbese ibiti byose byo mu mirima, byumiranye. Bityo rero, nta munezero ukirangwa mu bantu.

Bose barahamagarirwa gusiba kurya no gutakambira Uhoraho

¹³ Nimukenyere maze muganye, mwe baherezabitambo! Namwe abashinzwe imirimo yo ku rutambiro, nimuboroge! Nimurare ijoro mwambaye ibigunira, mwe abashinzwe imirimo y’Imana yanjye.

¹⁴ Nimwitagatifurishe gusiba kurya, mutangaze iteraniro ritagatifu, mukoranyirize abakuru b’umuryango n’abatuye igihugu bose mu Ngoro y’Uhoraho, Imana yanyu, maze mutakambire Uhoraho.

Umunsi w’Uhoraho uregereje

¹⁵ Yuu! Mbega umunsi! Umunsi w’Uhoraho uregereje! Dore nguyu, uje ari kirimbuzi, uturutse kuri Nyir’ububasha.

¹⁶ None se ntitwabyiboneraga n’amaso yacu ko ibiribwa bivanyweho, ibyishimo n’umunezero bikabura mu Ngoro y’Uhoraho?

¹⁷ Imbuto zumiye ku mayogi, imitiba nta kikiyihunitsemo; ibigega byarasenyutse kuko ingano zabuze.

¹⁸ Nimwiyumvire namwe ukuntu amatungo aboroga! Amashyo y’inka arangara kuko atakigira urwuri; ndetse n’amatungo magufi yacitse intege.

¹⁹ Uhoraho, ni wowe ntakambira, kuko umuriro wayogoje inzuri zo mu mayaga, ikirimi cy’umuriro gitwika ibiti byose byo mu murima.

²⁰ Dore, ndetse n’inyamaswa z’ishyamba ziguhanze amaso, kuko imigezi yakamye n’umuriro ukayogoza mu mayaga.