Yosuwa 6 - Kinyarwanda Bibiliya Ntagatifu

Abayisraheli bafata Yeriko

¹ Yeriko yari ifunze bikomeye, nta wasohokaga nta n’uwinjiraga, kubera gutinya Abayisraheli.

² Uhoraho abwira Yozuwe, ati «Dore Yeriko n’umwami wayo n’abantu bayo bakomeye, ndabibeguriye.

³ Mwebwe rero, ingabo zose ziri ku rugamba, muzazenguruke umugi incuro imwe; ibyo muzabigire iminsi itandatu.

⁴ Abaherezabitambo barindwi bazatwara amahembe ya rugeyo, bajye imbere y’Ubushyinguro. Umunsi wa karindwi, umugi muzawuzenguruka karindwi, abaherezabitambo ari ko bavuza ihembe.

⁵ Ihembe rya rugeyo nirivuga — mukumva ihembe riranguruye ijwi —, rubanda rwose ruzavuze urwamo rwinshi cyane, urukuta rw’umugi ruzaherako rwiture hasi, maze rubanda burire buri muntu aboneje imbere ye.»

⁶ Yozuwe, mwene Nuni, ahamagaza abaherezabitambo, arababwira ati «Nimuheke Ubushyinguro bw’Isezerano, maze abaherezabitambo barindwi batware amahembe arindwi ya rugeyo, bajye imbere y’Ubushyinguro bw’Uhoraho.»

⁷ Abwira na rubanda, ati «Nimugende muzenguruke umugi, ariko ingabo ziteguye kurwana zibanze imbere y’Ubushyinguro bw’Uhoraho.»

⁸ Byose bigenda uko Yozuwe yabibwiye rubanda: abaherezabitambo barindwi batwaye amahembe arindwi ya rugeyo, bagenda bayavuza imbere y’Uhoraho. Ubushyinguro bw’Isezerano ry’Uhoraho bwari bubakurikiye.

⁹ Ingabo ziteguye kurwana zari imbere y’abaherezabitambo bavuza ihembe; ingabo z’inyuma zikurikiye Ubushinguro; uko bavuzaga ihembe ni ko bagendaga.

¹⁰ Yozuwe yari yahaye rubanda iri tegeko, agira ati «Ntimuzasakuze, ijwi ryanyu ntirizumvikane, kandi ntihazagire n’ijambo na rimwe risohoka mu kanwa kanyu, kugeza umunsi nzababwira nti ’Muvuze urwamo!’; ubwo ni ho muzavuza urwamo.»

¹¹ Ubushyinguro bw’Uhoraho buzenguruka umugi incuro imwe, hanyuma bagaruka mu ngando baraharara.

¹² Bukeye Yozuwe abyuka mu gitondo cya kare, maze abaherezabitambo baheka Ubushyinguro bw’Uhoraho.

¹³ Abaherezabitambo barindwi batwara amahembe ya rugeyo imbere y’Ubushyinguro bw’Uhoraho, bongera kugenda bavuza ihembe. Ingabo ziteguye kurwana zagendaga imbere yabo, naho abandi bakurikira Ubushyinguro; bagenda bavuza ihembe.

¹⁴ Kuri uwo munsi wa kabiri, bazenguruka umugi incuro imwe, hanyuma bagaruka mu ngando. Babigenjeje batyo iminsi itandatu.

¹⁵ Ku munsi wa karindwi babyuka mu museke, maze bazenguruka umugi nk’uko bari basanzwe babigenza, bawuzenguruka incuro ndwi; uwo munsi wonyine ni bwo bazengurutse umugi incuro ndwi.

¹⁶ Ku ncuro ya karindwi, abaherezabitambo bakivuza ihembe, Yozuwe abwira rubanda ati «Nimuvuze urwamo! kuko Uhoraho yabeguriye umugi.

¹⁷ Umugi uzarimburwa n’ibiwurimo byegurirwe Uhoraho; Rahabu wenyine, ya ndaya, ni we uzarokoka n’abo bazaba bari kumwe mu nzu, kuko yahishe intumwa twari twohereje.

¹⁸ Naho mwe, mumenye ko nta kigomba gucika ku icumu, kugira ngo umugi numara kurimbuka, mutazavaho mugira icyo muhakura, bigatuma ingando ya Israheli ihakura umuvumo, ikazavaho igusha ishyano.

¹⁹ Feza yose, zahabu yose, n’ibikozwe mu muringa cyangwa mu butare, ibyo byose bizegurirwa Uhoraho, maze byinjizwe mu mutungo w’Uhoraho.»

²⁰ Rubanda ruvuza urwamo maze ihembe riroroma. Imbaga yumvise umworomo w’ihembe, bavuza urwamo rwinshi maze urukuta rw’umugi ruhita rurindimuka ako kanya; rubanda bazamuka biroha mu mugi buri wese aboneje imbere ye, maze bigarurira umugi.

²¹ Ibyari mu mugi byose barabitsemba, yaba umugabo, yaba umugore, umusore cyangwa umusaza, impfizi, intama n’indogobe, babimarira ku icumu.

Yozuwe ababarira Rahabu

²² Yozuwe abwira ba bagabo babiri batase igihugu, ati «Nimwinjire mu nzu ya ya ndaya, maze mukuremo uwo mugore n’ibye byose, nk’uko mwabimurahiye.»

²³ Ba basore baje gutata binjira kwa Rahabu, bamuvanamo, we na se, na nyina, na basaza be, n’ibye byose; bakuramo abo mu muryango we bose, maze babashyira hirya y’ingando ya Israheli.

²⁴ Naho umugi bawutwikana n’ibiwurimo byose, keretse feza, zahabu n’ibindi bikozwe mu muringa no mu butare, maze babyongera ku mutungo w’Ingoro y’Uhoraho.

²⁵ Yozuwe akiza atyo Rahabu w’indaya, n’umuryango we, n’ibye byose; kuko yahishe intumwa Yozuwe yari yohereje gutata Yeriko. Uwo mugore yabaye mu Bayisraheli, n’abamukomokaho bakomeje gutura muri bo kugeza na n’ubu.

²⁶ Icyo gihe, Yozuwe arahira, agira ati «Arabe ikivume imbere y’Uhoraho, umuntu wese uzahirahira ngo arubaka uyu mugi wa Yeriko! Natangira kuwubaka, umwana we w’imfura azahagwa; nawushyiraho inzugi arangije, umuhererezi we ahagwe!»

²⁷ Uhoraho yagumanye na Yozuwe, wari umaze kuba ikirangirire mu gihugu cyose.