Yosuwa 4 - Kinyarwanda Bibiliya Ntagatifu

Amabuye cumi n’abiri y’urwibutso

¹ Ubwo imbaga yose imaze kwambuka Yorudani, Uhoraho abwira Yozuwe, ati

² «Fata abantu cumi na babiri muri rubanda, umuntu umwe muri buri muryango,

³ maze ubategeke uti ’Mukure hano muri Yorudani nyirizina, aho ibirenge by’abaherezabitambo byari bihagaze, amabuye cumi n’abiri; muyambukane maze muyashinge aho muza kurara.’»

⁴ Nuko Yozuwe ahamagara abantu cumi na babiri yari yatoranyije mu Bayisraheli, umuntu umwe muri buri muryango,

⁵ maze Yozuwe arababwira ati «Nimunyure imbere y’Ubushyinguro bw’Uhoraho, Imana yanyu, mugane rwagati muri Yorudani, maze buri muntu atware ibuye ku rutugu, uko imiryango y’Abayisraheli ingana,

⁶ kugira ngo ibyo bizababere ikimenyetso muzahorana. Ejo, abahungu banyu nibababaza bati ’Aya mabuye abibutsa iki?’,

⁷ muzabasubize muti ’Ni uko amazi ya Yorudani yacitsemo kabiri imbere y’Ubushyinguro bw’Isezerano ry’Uhoraho, igihe bunyuze muri Yorudani! Amazi ya Yorudani yacitsemo kabiri, none aya mabuye azahora atubera urwibutso, twe Abayisraheli.’»

⁸ Nuko Abayisraheli bagenza uko Yozuwe yabategetse: batora amabuye cumi n’abiri yo muri Yorudani rwagati, nk’uko Uhoraho yari yabibwiye Yozuwe, bakurikije umubare w’imiryango y’Abayisraheli, maze barayajyana bayageza ku ngando baba ari ho bayashyira.

⁹ Yozuwe ashingisha amabuye cumi n’abiri muri Yorudani rwagati, bayashinga aho abaherezabitambo bari bahetse Ubushyinguro bw’Isezerano bari bashinze ibirenge, kandi aracyahari na n’ubu.

¹⁰ Abaherezabitambo bahetse Ubushyinguro baguma muri Yorudani rwagati, kugeza ubwo huzuzwa ibyo Uhoraho yari yategetse Yozuwe kubwira rubanda byose, nk’uko Musa yari yarabitegetse Yozuwe. Nuko imbaga yihutira kwambuka.

¹¹ Maze rero rubanda rwose rumaze kwambuka, Ubushyinguro bw’Uhoraho hamwe n’abaherezabitambo banyura imbere y’imbaga.

¹² Bene Rubeni, bene Gadi n’igice kimwe cya kabiri cya bene Manase babanziriza abandi Bayisraheli, bitegura intambara, nk’uko Musa yari yarabibabwiye.

¹³ Abantu bageze ku bihumbi mirongo ine, bitwaje intwaro kandi biteguye kurwana, banyura imbere y’Uhoraho bajya ahagana mu kibaya cya Yeriko.

¹⁴ Uwo munsi Uhoraho yubahiriza Yozuwe mu maso y’Abayisraheli bose, nuko bamutinya batyo nk’uko batinyaga Musa mu buzima bwe bwose.

¹⁵ Nuko Uhoraho abwira Yozuwe, ati

¹⁶ «Tegeka abaherezabitambo bahetse Ubushyinguro bw’Isezerano, bazamuke bave muri Yorudani.»

¹⁷ Maze Yozuwe ategeka abaherezabitambo, ati «Nimuzamuke muve muri Yorudani!»

¹⁸ Nuko abaherezabitambo bahetse Ubushyinguro bw’Uhoraho barazamuka bava muri Yorudani, bagishinga ibirenge imusozi, ako kanya amazi asubira mu mwanya wayo, yongera gutemba nka mbere hagati y’inkombe zayo.

¹⁹ Imbaga iva kuri Yorudani ku wa cumi w’ukwezi kwa mbere, maze icumbika i Giligali, mu burasirazuba bwa Yeriko.

²⁰ Naho ya mabuye cumi n’abiri bakuye muri Yorudani, Yozuwe ayashingisha i Giligali.

²¹ Hanyuma abwira Abayisraheli ati «Ejo abahungu banyu nibabaza ba se bati ’Aya mabuye abibutsa iki?’,

²² muzabimenyeshe abahungu banyu muvuga muti ’Israheli yambukiye Yorudani hano humutse.

²³ Uhoraho, Imana yanyu, yakamije amazi ya Yorudani mubyirebera, kugeza ubwo mwambutse, nk’uko Uhoraho, Imana yanyu, yabigize ku mazi y’inyanja y’Urufunzo, ubwo yayakamyaga tubyirebera kugeza ubwo twambutse,

²⁴ kugira ngo abantu b’isi yose bamenye ko ikiganza cy’Uhoraho ari ikinyabubasha, kugira ngo kandi iminsi yose mujye mutinya Uhoraho, Imana yanyu.’»