Yosuwa 2 - Kinyarwanda Bibiliya Ntagatifu

Yozuwe yohereza intasi ebyiri i Yeriko

¹ Yozuwe, mwene Nuni, ari i Shitimu, yohereza abantu babiri gutata rwihishwa, arababwira ati «Mugende murebe igihugu cya Yeriko.» Bajyayo binjira mu nzu y’umugore w’indaya witwaga Rahabu, kugira ngo baze kuharara.

² Ibyo bigera ku mwami w’i Yeriko, baramubwira bati «Dore abantu b’Abayisraheli binjiye hano muri iri joro, kugira ngo batate igihugu.»

³ Nuko umwami w’i Yeriko atuma kuri Rahabu, ati «Shyira ahagaragara abagabo baje iwawe, ba bandi wacumbikiye, kuko bazanywe no gutata igihugu cyose.»

⁴ Ariko uwo mugore ajyana ba bagabo uko ari babiri, maze arabahisha. Hanyuma araza, aravuga ati «Ni byo koko, abo bantu baje iwanjye, ariko sinari nzi iyo baturuka.

⁵ Nyamara, ubwo bendaga gufunga amarembo y’umugi bwije, abo bantu basohotse. Sinamenye rero aho bagannye. Mubakurikire vuba, murabafata.»

⁶ Mu by’ukuri yari yabohereje hejuru y’inzu, maze abahisha mu byatsi yari yaharundishije.

⁷ Abantu babakurikira bwangu bagana ku byambu bya Yorudani, nuko bakimara gusohoka bafunga amarembo.

⁸ Naho bo, bari batararyama ubwo Rahabu yazamukaga kubareba hejuru y’inzu,

⁹ maze arababwira ati «Nzi ko Uhoraho yabahaye iki gihugu, ko ubwoba bwadutashye kandi ko abantu b’igihugu bose bahinda umushyitsi imbere yanyu,

¹⁰ kuko twumvise bavuga ko Uhoraho yumukije imbere yanyu amazi y’inyanja y’Urufunzo igihe muvuye mu Misiri, twumvise kandi n’ibyo mwagiriye abami bombi b’Abahemori hakurya ya Yorudani, Sihoni na Ogi, mwarimbuye.

¹¹ Twarabyumvise ducika intege; maze imbere yanyu ntitwaba tugihumeka, kuko Uhoraho, Imana yanyu, ari Imana hejuru mu kirere kimwe na hano ku isi.

¹² None rero mubirahize Uhoraho: ubwo nababereye imfura, namwe muzabe ari ko muzagenzereza umuryango wanjye. Mumpe ikimenyetso kigaragara,

¹³ ko data, mama, basaza banjye, barumuna banjye na bakuru banjye nta cyo bazaba n’ibyabo byose, ko ahubwo muzaturinda urupfu.»

¹⁴ Ba bagabo baramusubiza bati «Turagapfa ubwacu, nitutabababarira; gusa ntimuzatuvemo! Uhoraho namara kuduha igihugu, tuzababanira neza kandi gipfura.»

¹⁵ Nuko Rahabu abamanurira ku mugozi mu idirishya, kuko inzu ye yari ifatanye n’urukuta rw’umugi, akaba yari atuye muri urwo rukuta nyine.

¹⁶ Arababwira ati «Mwerekeze iyo mu misozi, kugira ngo mudasakirana n’ababakurikiye; muzahihishe iminsi itatu, kugeza ubwo ababakurikiye bazagaruka, hanyuma muzashobora gukomeza urugendo rwanyu.»

¹⁷ Abo bantu baramubwira bati «Dore uko tuzakurikiza iyo ndahiro uturahije:

¹⁸ nitwinjira mu gihugu, uzazirike uyu mugozi utukura ku idirishya watumanuriyemo; maze so na nyoko na basaza bawe, n’umuryango wawe wose uzabakoranyirize iwawe mu nzu.

¹⁹ Nihagira n’umwe muri mwe uzacaracara akajya hanze, amaraso ye ntazatubazwe, ubwo rero tuzaba turi abere; ariko uwo muzaba muri kumwe mu nzu, nihagira umukoza n’urutoki, amaraso ye azaduhame.

²⁰ Nyamara nutuvamo, ubwo tuzaba tutagikurikije iyi ndahiro waturahije.»

²¹ Arabasubiza ati «Bibe nk’uko mubivuze!» Hanyuma arabasezerera baragenda, nuko azirika wa mugozi utukura ku idirishya.

²² Barigendera, maze berekeza iyo mu misozi, bahamara iminsi itatu kugeza ubwo abari babakurikiye batahutse; abari babakurikiye, babashakiye ku muhanda wose, barababura.

²³ Nuko ba bantu babiri bamanuka umusozi, baragenda no kwa Yozuwe mwene Nuni, maze bamutekerereza ibyo babonye byose.

²⁴ Babwira Yozuwe bati «Mu by’ukuri, Uhoraho yatweguriye igihugu cyose, ndetse n’abaturage bacyo bose twabateye guhinda umushyitsi.»