Yosuwa 13 - Kinyarwanda Bibiliya Ntagatifu

II. IMIRYANGO YA ISRAHELI YIGABANYA IGIHUGU Ibihugu bitahiwe gutsindwa

¹ Yozuwe yari ashaje kandi ageze mu zabukuru. Nuko Uhoraho aramubwira ati «Urashaje kandi ugeze mu zabukuru; ikindi kandi, ahasigaye kwigarurirwa haracyari hanini cyane.

² Dore igihugu gisigaye uko kingana: Hari intara zose z’Abafilisiti n’iz’Abageshuri zose,

³ kuva kuri Shihori ahateganye na Misiri kugeza mu karere ka Ekironi, mu majyaruguru, twakwita ah’Abakanahani. Abami batanu b’Abafilisiti ni aba: uw’i Gaza, uw’i Ashidodi, uw’i Ashikeloni, uw’i Gati n’uw’i Ekironi. (Kandi haracyari n’Abahawi batuye mu majyepfo.)

⁴ Hasigaye n’igihugu cyose cy’Abakanahani, n’icya Meyara gituwe n’Abasidoni kugera i Afeki, ukagera no ku rubibi rw’Abahemori;

⁵ ukongeraho n’igihugu cy’Abagibili na Libani yose mu burasirazuba, kuva i Behali‐Gadi mu nsi y’umusozi wa Herimoni kugera i Hamati.

⁶ Hasigaye n’abaturage bose bo mu misozi, kuva i Libani kugera i Misirefoti, n’Abasidoni bose. Nzabanyaga ubwanjye mu maso y’Abayisraheli. Icyo ugomba gukora gusa, ni ukubiraga Israheli nk’uko nabigutegetse.

⁷ None rero, iki gihugu kigabanye, ugiheho umunani imiryango cyenda n’icya kabiri cya Manase: bagabanye igihugu cyose kuva kuri Yorudani kugera ku Nyanja Nini iburengerazuba, Inyanja Nini izababera imbago.

Uko bari bagabanyije ibihugu by’iburasirazuba bwa Yorudani

⁸ Ikindi cya kabiri cya Manase hamwe na bene Rubeni na bene Gadi, Musa yari yabahaye umunani wabo hakurya ya Yorudani mu burasirazuba. Dore uko Musa, umugaragu w’Uhoraho yawubahaye:

⁹ kuva Aroweri iri haruguru y’amasumo ya Arunoni no kuva ku mugi uri hepfo, iruhande rw’amasumo; umurambi wose wa Madaba kugera i Diboni;

¹⁰ imigi yose ya Sihoni, umwami w’Abahemori wategekeraga i Heshiboni kugeza ku rugabano rw’Abahamori;

¹¹ ukongeraho Gilihadi n’igihugu cy’Abageshuri n’Abamahaka, ndetse n’umusozi wose wa Herimoni na Bashani yose kugera i Salika;

¹² no muri Bashani, igihugu cyose cy’umwami Ogi, wategekeraga Ashitaroti na Edereyi, kandi akaba yari umwe mu Barefayimu bari basigaye. Musa yarabatsinze, maze arabanyaga.

¹³ Ariko Abayisraheli ntibanyaze Abageshuri n’Abamahaka; bituma Abageshuri n’Abamahaka bakomeza gutura muri Israheli kugeza na n’ubu.

¹⁴ Umuryango wa Levi wonyine ni wo utahawe umunani: Uhoraho, Imana ya Israheli, ni we beguriweho umurage, nk’uko bari barabisezeranyijwe.

Umunani wa bene Rubeni

¹⁵ Musa yari yahaye umugabane umuryango wa bene Rubeni, akurikije amazu yabo.

¹⁶ Bahawe igihugu giherereye Aroweri haruguru y’amasumo ya Arunoni, n’umugi w’iruhande rw’amasumo, n’umurambi wose ugera kuri Madaba,

¹⁷ bahawe Heshiboni n’imigi yayo yose iri ku murambi: Diboni, Bamoti‐Behali, Beti‐Behali, Mewoni,

¹⁸ Yahasi, Kedemoti, Mefahati,

¹⁹ Kiryatayimu, Sibima, Sereti‐Shahari yo mu misozi ikikije ikibaya,

²⁰ Beti‐Pewori, imicyamo ya Pisiga na Betiyeshimoti;

²¹ bahawe n’imigi yose yo ku murambi, igihugu cyose cya Sihoni, umwami w’Abahemori wategekeraga i Heshiboni, Musa akamwicira hamwe n’abategetsi b’i Madiyani: ari bo Ewi, Rekemi, Suri, Huri na Reba bari batuye mu gihugu bagategekwa na Sihoni.

²² Mu bo Abayisraheli bishe hari na Balamu mwene Bewori w’umupfumu, bicishije inkota.

²³ Urubibi rwa bene Rubeni rwari Yorudani n’ibiyikikije. Uwo ni wo munani bene Rubeni bahawe, bakurikije amazu yabo, imigi n’imidugudu yabo.

Umunani wa bene Gadi

²⁴ Musa kandi yari yahaye umugabane umuryango wa bene Gadi, akurikije amazu yabo.

²⁵ Intara bahawe ni Yazeri, imigi yose ya Gilihadi n’icya kabiri cy’igihugu cy’Abahamoni kugera i Aroweri, ahateganye na Raba;

²⁶ hanyuma bahawe kuva i Heshiboni kugera i Ramati‐Misipa na Betonimi, no kuva i Mahanayimu kugera ku rugabano rwa Lodebari.

²⁷ Mu kibaya bahawe na Betiharamu, Betinimira, Sukoti, Safoni, ahasigaye h’igihugu cya Sihoni, umwami wa Heshiboni, hamwe na Yorudani n’ibiyikikije kugera ku mpera z’inyanja ya Kinereti, hakurya ya Yorudani, iburasirazuba.

²⁸ Uwo ni wo munani Bene Gadi bahawe bakurikije amazu yabo, imigi n’imidugudu yabo.

Umunani w’icya kabiri cya bene Manase

²⁹ Icya kabiri cy’umuryango wa bene Manase, Musa yari yagihaye umugabane akurikije amazu yabo.

³⁰ Intara bahawe ni uguhera i Mahanayimu, Bashani yose, igihugu cyose cya Ogi, umwami wa Bashani, n’ingando za Yayiri zose zari muri Bashani, byose hamwe biba imigi mirongo itandatu.

³¹ Icya kabiri cy’intara ya Gilihadi, hamwe na Ashitaroti na Ediroti, imigi y’igihugu cy’umwami Ogi muri Bashani, byahawe icya kabiri cya bene Makiri, umuhungu wa Manase, bakurikije amazu yabo.

³² Uwo ni wo munani Musa yatanze mu bibaya bya Mowabu hakurya ya Yorudani, mu burasirazuba bwa Yeriko.

³³ Ariko Musa nta munani yahaye bene Levi; Uhoraho, Imana ya Israheli ni we munani wabo nk’uko yari yabibabwiye.