Yonasi 2 - Kinyarwanda Bibiliya Ntagatifu

Yonasi arokoka

¹ Uhoraho ategeka ifi nini kumira Yonasi. Yonasi amara mu nda y’ifi iminsi itatu n’amajoro atatu.

² Aho yari aho mu nda y’ifi, asenga Uhoraho Imana ye, ati

³ «Ubwo nari mu kaga natakiye Uhoraho maze aransubiza. Ubwo nari ikuzimu narahamagaye, wumva ijwi ryanjye.

⁴ Wari waranjugunye mu ndiba y’inyanja, rwagati muri zo, maze ngotwa n’umwuzure. Imivumba yawe yose n’ingashya byawe binyirohaho.

⁵ Nanjye nkavuga nti ’Nciwe mu maso yawe; nzongera kureba nte Ingoro yawe ntagatifu?’

⁶ Amazi yaramize ngerwa mu mihogo, imihengeri irangota, icyatsi cyo mu nyanja kinyizinguriza ku mutwe.

⁷ Nagarukiye aho imisozi itewe inkingi, bampeza inyuma y’ishyanga ubuziraherezo. Nyamara ni wowe wazahuye mu rwobo ubuzima bwanjye, Uhoraho Mana yanjye.

⁸ Igihe nari nihebye, nta mutima nkigira, ni bwo nibutse Uhoraho, maze isengesho ryanjye rikugeraho mu Ngoro yawe ntagatifu.

⁹ Abibeshya bakiringira ibitagira shinge, nibizeyukire.

¹⁰ Jyewe nzagutura igitambo, nkuririmbire ngushimira, nzarangiza n’icyo nasezeranye. Uhoraho ni we mukiza!»

¹¹ Uhoraho ategeka ifi, iruka Yonasi ku nkombe.