Yohana 15 - Kinyarwanda Bibiliya Ntagatifu

Umuzabibu n’amashami yawo

¹ Ndi umuzabibu w’ukuri, naho Data akaba umuhinzi.

² Ishami ryose riterera imbuto muri jye, araritema; naho ishami ryera imbuto, araryicira agira ngo rirusheho kwera imbuto.

³ Mwe murakeye kubera ijambo nababwiye.

⁴ Nimube rero muri jyewe, nanjye mbe muri mwe. Uko ishami ridashobora kwera imbuto ku bwaryo ritari ku muzabibu, namwe ni ko mutakwera mutandimo.

⁵ Jye ndi umuzabibu, mwe mukaba amashami. Uba rero muri jye, nanjye nkaba muri we, yera imbuto nyinshi; koko tutari kumwe nta cyo mwashobora.

⁶ Utaba muri jye, azajugunywa nk’ishami ritera, maze yumagane, kandi bene ayo mashami barayasakuma, bakayajugunya mu muriro, agashya.

⁷ Nimumbamo n’amagambo yanjye akababamo, muzasabe icyo muzashaka cyose muzagihabwa.

⁸ Igihesha Data ikuzo ni uko mwakwera imbuto nyinshi, mukaba n’abigishwa banjye.

⁹ Uko Data yankunze, ni ko nanjye nabakunze. Nimugume mu rukundo rwanjye.

¹⁰ Nimwubaha amategeko yanjye, muzaguma mu rukundo rwanjye, nk’uko nanjye nubaha amategeko ya Data, maze nkaguma mu rukundo rwe.

Itegeko ryo gukundana

¹¹ Ibyo mbibabwiye ngira ngo ibyishimo byanjye bibabemo, kandi ngo ibyishimo byanyu bisendere.

¹² Ngiri itegeko mbahaye: nimujye mukundana nk’uko nanjye nabakunze.

¹³ Nta wagira urukundo ruruta urw’umuntu uhara amagara ye kubera incuti ze.

¹⁴ Muba muri incuti zanjye, igihe mukora icyo mbategetse.

¹⁵ Jye sinkibita abagaragu, kuko umugaragu atamenya icyo shebuja akora; ahubwo mbise incuti, kuko nabamenyesheje ibyo numvanye Data byose.

¹⁶ Si mwe mwantoye, ahubwo ni jye wabatoye, maze mbashyiraho kugira ngo mugende, mwere imbuto, kandi imbuto yanyu igumeho; bityo icyo muzasaba Data cyose mu izina ryanjye, azakibahe.

¹⁷ Icyo mbategetse ni uko mukundana.

Isi yanga Yezu n’abe

¹⁸ Isi nibazira, mumenye ko ari jye yabanje kwanga.

¹⁹ Iyo muba ab’isi, isi yakunze ikiri icyayo; ariko kuko mutari ab’isi, kandi nkaba narabatoye mbakura mu isi, ni cyo isi izabaziza.

²⁰ Mwibuke ijambo nababwiye ko ’Nta mugaragu uruta shebuja.’ Niba barantoteje namwe bazabatoteza, niba barubashye amagambo yanjye, n’ayanyu bazayubaha.

²¹ Ibyo byose bazabibagirira babaziza izina ryanjye, kuko batazi Uwantumye.

²² Iyo ntaza, byongeye iyo ntagira ijambo mbabwira, nta cyaha bajyaga kugira; ubu rero ntibafite uko bikuraho icyaha cyabo.

²³ Unyanga, aba yanze na Data.

²⁴ Iyo ntagaragariza muri bo ibikorwa bitigeze gukorwa n’undi wundi, nta cyaha bajyaga kugira; ubu rero barabibonye, bararenga baranyanga hamwe na Data.

²⁵ Ibyo rero byabaye kugira ngo ibyanditswe mu Mategeko byuzuzwe ngo ’Banyanze bampora ubusa.’

²⁶ Ariko Umuvugizi nzaboherereza, aturutse kuri Data, Roho Nyir’ukuri ukomoka kuri Data, naza azambera umugabo.

²⁷ Namwe rero muzambera abagabo, kuko twabanye kuva mu ntangiriro.