Yohana 12 - Kinyarwanda Bibiliya Ntagatifu

¹ Hasigaye iminsi itandatu Pasika ikaba, Yezu agaruka i Betaniya, aho Lazaro yari yarazuye mu bapfuye yabaga.

² Bahamuzimanirira ibya nimugoroba. Marita ni we waherezaga, naho Lazaro ari mu basangiraga na we.

³ Nuko Mariya areba incuro y’amavuta y’umubavu w’ukuri kandi uhenda cyane, ayasiga ibirenge bya Yezu, abihanaguza umusatsi we, maze umubavu utama mu nzu yose.

⁴ Ni bwo Yuda Isikariyoti, wo mu bigishwa be, wari ugiye kumugambanira, avuze ati

⁵ «Nk’uriya mubavu wajyaga kugurwa amadenari magana atatu, agahabwa abakene, upfuye iki?»

⁶ Ibyo ariko ntiyabivugiraga ko yari ababajwe n’abakene, ahubwo ni uko yari umujura; n’ubundi ni we wari umubitsi, akajya yiha ku byo bamubikije.

⁷ Nuko Yezu aravuga ati «Nimumwihorere, kuko uwo mubavu ubikiwe umunsi wo kunshyingura mu mva.

⁸ Abakene bo muzabahorana, ariko jye ntimuzamporana igihe cyose.»

⁹ Nuko imbaga nyamwinshi y’Abayahudi iza kumenya ko Yezu yari aho ngaho; ni bwo baje, ariko batazanywe na Yezu gusa, ahubwo bashaka no kubona Lazaro yari yarazuye mu bapfuye.

¹⁰ Nyamara abatware b’abaherezabitambo bajya inama yo kwica na Lazaro,

¹¹ kuko yatumaga Abayahudi benshi babacikaho, bakemera Yezu.

Yezu yakirwa i Yeruzalemu nk’umwami

¹² Bukeye bwaho, abantu benshi bari baje mu munsi mukuru bamenya ko Yezu na we aje i Yeruzalemu.

¹³ Bafata amashami y’imikindo, bajya kumusanganira, ari na ko batera hejuru bati «Hozana! Nahabwe impundu uje mu izina rya Nyagasani, ni we Mwami wa Israheli!»

¹⁴ Yezu abonye icyana cy’indogobe acyicaraho, nk’uko byari byaranditswe ngo

¹⁵ «Witinya, Mwari wa Siyoni, dore Umwami wawe aje akugana, yicaye ku cyana cy’indogobe.»

¹⁶ Abigishwa be babanza kuyoberwa icyo ibyo bivuga, ariko Yezu amaze gukuzwa, babona kwibuka ko ibyo bintu ari we byari byaranditsweho, ari na ko banabimugiriye.

¹⁷ Abari kumwe na we bose igihe ahamagaye Lazaro mu mva akamuzura mu bapfuye, na bo barabihamyaga.

¹⁸ Ni na cyo cyatumye rubanda ruza kumusanganira, kuko rwari rwamenye ko yakoze icyo gitangaza.

¹⁹ Nuko Abafarizayi baravugana bati «Ntimubona ko ari nta cyo bibamariye! Dore igihugu cyose cyashitse kimuyoboka!»

Abanyamahanga bashaka kubona Yezu

²⁰ Hari n’Abagereki bari baje gusenga ku munsi mukuru.

²¹ Begera Filipo wari uw’i Betsayida ho mu Galileya, baramwinginga bati «Nyakubahwa, turashaka kubona Yezu.»

²² Filipo na we ajya kubibwira Andereya. Andereya na Filipo bajya kubibwira Yezu.

Yezu yemeza ko urupfu rwe ruzamuhesha ikuzo

²³ Yezu abasubiza avuga ati «Koko igihe kirageze, cyo kugira ngo Umwana w’umuntu akuzwe.

²⁴ Ndababwira ukuri koko: imbuto y’ingano iyo itaguye mu gitaka ngo ihugute, ikomeza kuba yonyine; naho iyo ihuguse, yera imbuto nyinshi.

²⁵ Ukunda ubuzima bwe arabubura, kandi uwanga ubuzima bwe muri iyi si azabukomeza kugeza mu bugingo bw’iteka.

²⁶ Ushaka kumbera umugaragu nankurikire, maze aho ndi, abe ari na ho umugaragu wanjye azaba. Byongeye, ungaragira, Data azamwubahiriza.

²⁷ Ubu ariko umutima wanjye urahagaze, mvuge ngo iki se? Dawe, iyi saha uyinkize? Nyamara nzi ko ari cyo cyanzanye kugeza kuri iyi saha.

²⁸ Dawe, iheshe ikuzo!» Nuko ijwi rituruka mu ijuru riti «Nihesheje ikuzo kandi nzakomeza kuryihesha.»

²⁹ Abantu bari bahagaze aho kandi bari bumvise, baravuga bati «Ni inkuba ikubise.» Abandi na bo bati «Ni umumalayika umuvugishije.»

³⁰ Yezu arabasubiza ati «Iryo jwi si jye rivugiye, ahubwo ni mwebwe.

³¹ Ubu igihe cyo gucira isi urubanza kirageze; ubu umutware w’iyi si agiye gusukwa hanze.

³² Nanjye nimara kwererezwa hejuru y’isi, nzareshya bose mbiyegereze.»

³³ Ibyo yabivuze yerekana urupfu yari agiye kuzapfa.

³⁴ Nuko rubanda baramusubiza bati «Twumvise Amategeko avuga ko Kristu ahoraho iteka, none wowe wavuga ute ko Umwana w’umuntu azererezwa? Mbese uwo Mwana w’umuntu ni nde?»

³⁵ Yezu arababwira ati «Ubu ni igihe gito urumuri rubarimo; cyo nimugende mugifite urumuri, umwijima utabatungura, kuko ugenda mu mwijima, atamenya aho agana.

³⁶ Igihe mugifite urumuri, nimwemere urumuri, kugira ngo mube abana b’urumuri.» Yezu amaze kuvuga ibyo aragenda, ajya kubihisha.

Abayahudi banga kwemera Yezu

³⁷ N’ubwo yari yaraberetse ibyo bimenyetso byose, ntibamwemeraga,

³⁸ bityo harangira ibyavuzwe n’umuhanuzi Izayi ati «Nyagasani, ni nde wemeye ibyo yatwumvanye? Ni nde wahishuriwe ukuboko kwa Nyagasani?»

³⁹ Ngicyo icyatumaga badashobora kwemera. Izayi yunzemo ati

⁴⁰ «Yabahumye amaso, imitima yabo ayigira urutare, kugira ngo amaso yabo atabona, n’umutima wabo ugasobanukirwa, maze bakazahinduka nkazabakiza.»

⁴¹ Izayi yavuze ibyo, kuko yari yabonye ikuzo rya Yezu, kandi abivuga ari we abyerekejeho.

⁴² Icyakora benshi, ndetse no mu batware baramwemeraga, ariko kubera Abafarizayi ntibatinyuke kubyemeza, banga gucibwa mu isengero,

⁴³ kuko bakunze ikuzo ry’abantu kuruta ikuzo ry’Imana.

⁴⁴ Nuko Yezu arangurura ijwi ati «Unyemera si jye aba yemeye, ahubwo aba yemeye Uwantumye,

⁴⁵ kandi rero umbona aba abonye n’Uwantumye.

⁴⁶ Naje mu nsi ndi urumuri, kugira ngo unyemera wese adahera mu mwijima.

⁴⁷ Nihagira uwumva amagambo yanjye ntayakurikize, si jye umucira urubanza, kuko ntazanywe no gucira isi urubanza, ahubwo naje gukiza isi.

⁴⁸ Ungaya kandi ntiyakire amagambo yanjye, afite umucamanza we: ijambo navuze ni ryo rizamucira urubanza ku munsi w’imperuka.

⁴⁹ Kuko ntavuze ku bwanjye, ahubwo Data wantumye ni We wantegetse ibyo mvuga, n’ibyo nzavuga.

⁵⁰ Kandi nzi ko itegeko rye ari ubugingo bw’iteka. Jye rero ibyo mvuga, mbivuga uko Data yabimbwiye.»