Yohana 1 - Kinyarwanda Bibiliya Ntagatifu

Jambo, Urumuri n’Ubuzima

¹ Mu ntangiriro ya byose Jambo yariho, kandi Jambo yabanaga n’Imana, kandi Jambo akaba Imana.

² Ubwe mu ntangiriro yabanaga n’Imana.

³ Ni we ibintu byose bikesha kubaho, nta n’ikiremwa na kimwe cyabayeho bitamuturutseho.

⁴ Yari asanzwe yifitemo ubugingo, kandi ubwo bugingo bukaba urumuri rw’abantu.

⁵ Nuko urumuri rumurika mu mwijima, ariko umwijima wanga kurwakira.

⁶ Habayeho rero umuntu woherejwe n’Imana, izina rye rikaba Yohani.

⁷ Yazanywe no kuba umugabo wo guhamya iby’urwo rumuri, kugira ngo bose bamukeshe kwemera.

⁸ Si we wari urumuri, ahubwo yari umugabo uhamya iby’urwo rumuri.

⁹ Jambo ni we wari urumuri nyakuri, rumurikira umuntu wese uza kuri iyi si.

¹⁰ Yari mu isi, kandi isi yabayeho ku bwe, ariko isi irarenga ntiyamumenya.

¹¹ Yaje mu bye, ariko abe ntibamwakira.

¹² Nyamara abamwakiriye bose, yabahaye ububasha bwo guhinduka abana b’Imana, abo ni abemera Izina rye.

¹³ Ntibavutse ku bw’amaraso cyangwa ku bushake bw’umubiri, cyangwa se ku bushake bw’umuntu, ahubwo bavutse ku bw’Imana.

¹⁴ Nuko Jambo yigira umuntu maze abana natwe, kandi twibonera ikuzo rye, ikuzo Umwana w’ikinege akomora kuri Se, akaba asendereye ubuntu n’ukuri.

¹⁵ Yohani yabaye umugabo wo guhamya ibimwerekeyeho, maze arangurura ijwi avuga ati «Nguyu Uwo navuze nti ’Uje ankurikiye, aranduta, kuko yariho mbere yanjye.’»

¹⁶ Kandi twese twahawe ku busendere bwe, tugirirwa ubuntu bugeretse ku bundi.

¹⁷ Uko Amategeko yatanzwe anyuze kuri Musa, ni na ko ubuntu n’ukuri byatugejejweho binyujijwe kuri Yezu Kristu.

¹⁸ Nta wigeze abona Imana na rimwe; Umwana w’ikinege uba muri Se, ni We wayimenyekanishije.

Yohani Batisita yerekana Umukiza

¹⁹ Dore ubuhamya bwa Yohani igihe Abayahudi b’i Yeruzalemu bamutumyeho abaherezabitambo n’Abalevi kumubaza ngo «Uri nde?»

²⁰ Yohani yaremeje ntiyahakana, ahamya agira ati «Sindi Kristu.»

²¹ Na bo baramubaza bati «Bite se? Uzabe uri Eliya?» Arabasubiza ati «Sindi we.» — «Uzabe se uri wa Muhanuzi ugomba kuza?» Arabasubiza ati «Oya.»

²² Baramubwira bati «Rwose uri nde, kugira ngo tugire icyo dusubiza abadutumye. Wibwira ko uri nde?»

²³ Arabasubiza ati «Ndi ijwi ry’uvugira mu butayu aranguruye ati ’Nimutunganye inzira ya Nyagasani’, nk’uko umuhanuzi Izayi yabivuze.»

²⁴ Abari batumwe bari abo mu Bafarizayi.

²⁵ Bongera kumubaza bati «None se ko ubatiza, kandi utari Kristu, ntube Eliya, ntube na wa Muhanuzi, ubiterwa n’iki?»

²⁶ Yohani arabasubiza ati «Jyewe mbatiriza mu mazi, ariko hagati yanyu hari Uwo mutazi.

²⁷ Ni we ugiye kuza ankurikiye; sinkwiye no gupfundura umushumi w’inkweto ze.»

²⁸ Ibyo byabereye i Betaniya, hakurya ya Yorudani, aho Yohani yabatirizaga.

²⁹ Bukeye, Yohani abona Yezu aje amusanga, aravuga ati «Dore Ntama w’Imana ugiye gukuraho icyaha cy’isi.

³⁰ Ni we navugaga ngira nti ’Ngiye gukurikirwa n’umuntu unduta, kuko yariho mbere yanjye.’

³¹ Jye sinari muzi, ariko kugira ngo agaragarizwe Israheli, naje mbatiriza mu mazi.»

³² Nuko Yohani ahamya avuga ati «Nabonye Roho amanuka nk’inuma ivuye mu ijuru, maze amuguma hejuru.

³³ Koko jye sinari muzi, ariko Uwanyohereje kubatiriza mu mazi, yarambwiye ati ’Uwo uzabona Roho amumanukiraho kandi akamuhama hejuru, ni we ubwe ubatiza muri Roho Mutagatifu.’

³⁴ Naramwiboneye ubwanjye kandi ndahamya ko ari we Mwana w’Imana.»

Abigishwa ba mbere ba Yezu

³⁵ Bukeye, Yohani yari akiri aho, ari kumwe na babiri mu bigishwa be.

³⁶ Abonye Yezu ahise, aravuga ati «Dore Ntama w’Imana.»

³⁷ Ba bigishwa be bombi bumvise avuze atyo, bakurikira Yezu.

³⁸ Yezu arahindukira, abona bamukurikiye, arababaza ati «Murashaka iki?» Baramusubiza bati «Rabbi (ibyo bivuga ngo Mwigisha), utuye he?»

³⁹ Arababwira ati «Nimuze murebe.» Baraza babona aho atuye. Nuko uwo munsi bagumana na we. Hari nk’igihe cy’isaha ya cumi.

⁴⁰ Andereya, mwene nyina wa Simoni Petero, yari umwe muri abo babiri bari bumvise amagambo ya Yohani, bagakurikira Yezu.

⁴¹ Aza guhura mbere na mwene nyina Simoni, aramubwira ati «Twabonye Kristu» (ari byo kuvuga Umukiza).

⁴² Nuko amugeza kuri Yezu. Yezu aramwitegereza, aramubwira ati «Uri Simoni, mwene Yohani; none kuva ubu uzitwa Kefasi, ari byo kuvuga "Urutare".

⁴³ Bukeye bwaho, Yezu yemeza kujya mu Galileya; aza guhura na Filipo, aramubwira ati «Nkurikira.»

⁴⁴ Filipo yari uw’i Betsayida, umugi wa Andereya na Petero.

⁴⁵ Filipo na we aza guhura na Natanayeli, aramubwira ati «Wa wundi wanditswe mu Mategeko ya Musa no mu Bahanuzi, twamubonye: ni Yezu w’i Nazareti, mwene Yozefu.»

⁴⁶ Nuko Natanayeli aramubwira ati «Hari ikintu cyiza cyaturuka i Nazareti?» Filipo aramusubiza, ati «Ngwino wirebere.»

⁴⁷ Yezu abonye Natanayeli aje amugana, aravuga ati «Dore Umuyisraheli w’ukuri utarangwaho uburyarya.»

⁴⁸ Natanayeli aramubwira ati «Unzi ute?» Yezu aramusubiza ati «Filipo ataraguhamagara, uri mu nsi y’igiti cy’umutini, nakubonaga.»

⁴⁹ Natanayeli aramusubiza ati «Rabbi, koko uri Umwana w’Imana, uri Umwami wa Israheli.»

⁵⁰ Yezu aramubwira ati «Wemejwe n’uko nkubwiye ngo nakubonye uri mu nsi y’umutini; uzabona ibitambutse ibyo ngibyo.»

⁵¹ Arongera aramubwira ati «Ndakubwira ukuri koko: muzabona ijuru rikinguye n’abamalayika b’Imana bazamuka kandi bamanuka hejuru y’Umwana w’umuntu.»