Yobu 9 - Kinyarwanda Bibiliya Ntagatifu

Yobu asubiza Bilidadi

¹ Yobu afata ijambo, agira ati

² «Nzi neza ko ari uko bigenda, none se umuntu yatsinda Imana ate?

³ Iyo ashatse kujya impaka na yo, n’iyo yavuga kangahe, yo nta na rimwe imusubiza.

⁴ Mu banyabuhanga buhanitse no mu banyembaraga b’indahangarwa, ni nde wigeze kuyihangara, hanyuma akayihonoka?

⁵ Ni yo yimura imisozi mu ibanga, yarakara, ikayibirindura.

⁶ Ni yo iteza isi umutingito, iyo ijegajeza inkingi zayo.

⁷ Ni yo itegeka izuba, ntirirase, ikabuza n’inyenyeri kumurika.

⁸ Ni yo yonyine yahanze ikirere cy’ijuru, igatambagira hejuru y’inyanja.

⁹ Ni yo yahanze inyenyeri, izishyira ahazigenewe, maze izita amazina yazo.

¹⁰ Ni yo yaremye ibintu bikomeye, tudashobora gusobanukirwa, irema n’ibindi bitangaje kandi bitabarika.

¹¹ Iyo ihise iruhande rwanjye, sinyibona, n’iyo inyitseseho, simbyumva.

¹² Iramutse inyaze ikintu, ni nde wayikoma, maze ngo agire ati ’Urakora ibiki?’

¹³ Imana iyo yarakaye ntiyururwa, n’ibyegera bya Rahabu byubamye imbere yayo.

¹⁴ Jyewe se nashobora nte kwihandagaza ngo ndaburana, ngo ndashaka ingingo zayitsinda.

¹⁵ Jyewe, n’iyo naba mvuga ukuri, bimariye iki kwiregura; kandi ari yo Mucamanza wanjye, nkwiye gutakambira?

¹⁶ N’iyo nayihamagara ikaza, si byo byanyemeza ko yakumva ijwi ryanjye.

¹⁷ Koko, Nyir’ububasha arankandamiza ku busa, akarushaho kundema inguma nta mpamvu;

¹⁸ ntarushya andeka ngo mpumeke, ahubwo ahora anyuzuzamo indurwe y’umubabaro!

¹⁹ Twapima imbaraga se? We arazinsumbya kure! Namurega mu rukiko se? Ni nde wamuhatira kwitaba?

²⁰ Nketse ko ndi mu kuri, umunwa we wancira urubanza, nivuzeho ubunyamurava, yampindura umugome!

²¹ Kuba umunyamurava byo, nanjye simbyiyiziho, kuko nsigaye narihaze!

²² Kuri jyewe byose ni kimwe, ni yo mpamvu mvuga nti ’Atsemba umunyamurava n’umunyabyaha.’

²³ Iyo icyorezo cyagaritse ingogo, usanga ashungera abere bari mu kaga.

²⁴ Iyo igihugu gitegekwa n’umunyarugomo, apfukirana abacamanza bacyo; ubwo niba atari we ubitera, yaba nde wundi?

²⁵ Nyamara, iminsi y’ubuzima bwanjye iriruka amasigamana, irahunga itareba amahirwe;

²⁶ iranyerera nk’ubwato bwogoga inyanja, cyangwa kagoma iguye gitumo agakoko.

²⁷ Iyo ngize nti ’Reka niyibagize amaganya yanjye, nizihirwe kandi mwenyure’,

²⁸ ubwo icyoba kirantaha, nibutse amagorwa yanjye, kuko mba nzi ko atari uko ugenzereza intungane.

²⁹ Nzi ko nimburana, nzatsindwa, none se ubwo naba niruhiriza iki?

³⁰ N’iyo nakwiyuhagiza amazi yo ku iteke, nkisukura n’isabune nziza,

³¹ wakongera ukanzika mu musitwe, n’imyambaro yanjye ikanyinuka.

³² Koko, we si umuntu nkanjye ngo mbe namusubiza, cyangwa se ngo tujye kuburana mu rukiko.

³³ Nta n’uri hagati yacu ngo atwumvire urubanza, maze ngo twembi adushyireho ikiganza,

³⁴ kugira ngo andinde ubukana bwe, n’urugomo rwe runtera ubwoba!

³⁵ Ibyo ari byo byose, nzavuga ntamutinye, kuko, uko ankeka, atari ko ndi.