Yobu 5 - Kinyarwanda Bibiliya Ntagatifu

¹ Cyo hamagara! Hari uri bukwitabe se? Uriyambaza se iyihe mu ntungane?

² Ni koko umusazi yicwa n’agahinda, naho umupfayongo agashegeshwa n’ipfunwe.

³ Jyewe nabonye umusazi afata ikibanza, mperako mvuma inzu ye, nti

⁴ ’Abahungu be barakabura umukiro, barenganire ku karubanda, babure kivurira!

⁵ Umusaruro wabo uribwe n’umushonji, umutungo wabo ugotomerwe n’abafite inyota!’

⁶ Koko rero, icyago ntikivumbuka mu butaka, kandi umuruho ntumera ku butaka,

⁷ ahubwo umuruho uva ku bantu, nk’uko imirabyo ituruka mu birere.

⁸ Iyaba ari jyewe, nakwisunga Imana, ngatakambira Uhoraho.

⁹ Ni we wakoze ibintu byinshi by’agatangaza, kandi bidashobora kubarurwa ngo birangire.

¹⁰ Akwiza imvura ku isi yose, akanavubura amasoko mu misozi;

¹¹ ni we ukuza ab’intamenyekana, n’abamanjiriwe bakaronka umukiro.

¹² Aburizamo imigambi y’abigize inyaryenge, amaboko yabo akaruhira ubusa.

¹³ Ingirwabahanga azicisha imitego yazo, naho imigambi y’incabiranya ikaba impfabusa;

¹⁴ bityo bakarindagira mu mwijima, kandi ari ku manywa y’ihangu, bagasa n’abagenda mu ijoro, kandi amanywa ava.

¹⁵ Uhoraho arinda imfubyi inkota, kandi umukene akamukiza umuhutaza.

¹⁶ Ni uko umunyantege nke agira icyizere, maze umugome akamanjirwa.

¹⁷ Hahirwa uwo Uhoraho akosora! kandi ntasuzugure inyigisho ya Nyir’ububasha.

¹⁸ Koko rero ni we ukomeretsa, kandi ni we womora, arababaza, ariko ibiganza bye birakiza.

¹⁹ Mu makuba menshi, azagutabara, kandi nugera mu kaga, nta cyago kizaguhungabanya.

²⁰ Mu nzara, azakurinda urupfu; ku rugamba, akurinde inkota.

²¹ Uzaca ukubiri n’akanwa kabi ka rubanda, kandi icyorezo nigitera, ntuzagira ubwoba.

²² Ntuzakangwa n’icyorezo cyangwa inzara, kandi ntuzatinya inyamaswa zo mu ishyamba.

²³ Ni koko uzagirana amasezerano n’amabuye yo mu murima, kandi wumvikane n’ibisimba by’agasozi.

²⁴ Uzasanga urugo rwawe ruguwe neza, nujya kurusura usange nta cyo rubuze.

²⁵ Uzabona urubyaro rwawe rwororoka, n’abagukomokaho bakura nk’ibyatsi byo mu mirima.

²⁶ Uzajya gupfa ushyize kera, nk’uko barunda imiba y’ingano zeze.

²⁷ Ibyo tukubwiye si inkuru mbarirano, ni ko bigenda! Ahasigaye, bizirikane, ku buryo byakugirira akamaro.»