Yobu 41 - Kinyarwanda Bibiliya Ntagatifu

¹ Uzicuza icyatumye uyihangara, kuyikubita amaso byonyine bica intege.

² Nta watinyuka kuyikora mu jisho, kuko ntawakwigerera kuyirwanya.

³ Ni nde wigeze ayisagarira, akayihonoka? Nta n’umwe ku isi yose!

⁴ Reka nyitake ibigango byayo, nkubwire ukuntu imbaraga zayo zihambaye.

⁵ Ni nde wigeze ayorosoraho igikoba cyayo, cyangwa ngo ahinguranye uruhu rwayo?

⁶ Ni nde wigeze yasamura urwasaya rwayo? Imikaka yayo iteye ubwoba!

⁷ Umugongo wayo ugizwe n’ingabo zigerekeranye, zihomesheje ubujeni bukomeye nk’ibuye.

⁸ Imwe igiye imatana n’indi, ku buryo nta muyaga wazica hagati.

⁹ Ziramatanye uko zikurikirana, ni urusobe rw’intamenwa . .

¹⁰ Iritsamura, umuriro ukaka, amaso yayo ni nk’umutukurira wo mu museke.

¹¹ Mu rwasaya rwayo haba amafumba y’umuriro, ugasanga hatera ibishashi.

¹² Amazuru yayo aracumbeka, ukagira ngo ni intango y’amazi abira.

¹³ Ihumekera ku bihuru bikababuka, mu rwasaya rwayo hagasohokamo ibishashi by’umuriro.

¹⁴ Mu gikanu cyayo ni ho imbaraga zayo zagandiye, imbere yayo, ibihari byose bishya ubwoba.

¹⁵ Urwakanakana rwayo ruratsitse, kandi ntirunyeganyega.

¹⁶ Umutima wayo ukomeye nk’urutare, cyangwa nk’ibuye ry’urusyo.

¹⁷ Iyo ibadutse, amazi arahungabana, imivumba y’inyanja igashya ubwoba.

¹⁸ Ntikangwa inkota, kuko itayitobora, emwe habe n’icumu cyangwa umwambi.

¹⁹ Kuyitera icumu ni nko kuyikubita akatsi, naho kuyirasa umwambi ni nko kuyitera agati kamunzwe.

²⁰ Ntitsimburwa n’imyambi y’abakogoto, kuyitera imihumetso ni nko kuyikozaho utwatsi.

²¹ Kuyikubita ubuhiri ni nko kuyikirigitisha utwatsi, ntikangwa umuvumero w’icumu.

²² Ku nda yayo hari ibivuvu bimeze nk’injyo zityaye, aho inyuze mu cyondo yikurura, ihasiga umugendo.

²³ Amazi yo mu marongi iyatera kubirirana, naho inyanja ikayihindura nk’icyotezo cyaka.

²⁴ Aho inyuze ihasiga urwererane, ukagira ngo hatwikiriwe n’igicu cyera.

²⁵ Nta cyo bingana ku isi, yaremwe ari igihangange.

²⁶ Izishirika ubwoba mu nyamaswa, zirayitinya, iz’intwari zose, yigize umutware wazo.»